Kular u CM ban weng ia ki jingeh ki nongtrei Muster Roll namar ka jingslem tulop

Syllad | The Rising MeghalayaAugust 17, 2023

U Myntri Rangbah ka jylla u Conrad K Sangma u la kular ban shimkhia halor ki jingeh jong ki nongtrei Muster Roll ha kaba iadei bad ka jingslem jong ka tulop da kaba ong ruh ba un khmih ba kan don ka jingiatreilang hapdeng ki tnat sorkar bad ban hukum ruh ia ka tnat pla tyngka ba kan pyllait lypa lai bnai shwa ia ka pisa sha ki tnat sorkar khnang ban lah ban siew biang por ia ki tulop jong ki.

Ia kane u CM u la pynpaw haba kren ha ka  General Meeting kaba Phra ba la khot pynlong da ka All Jaintia Muster Roll Workers and Labour Union ha ryngkat ka jingiatreilang bad ka Union of Cook cum Helpers PM Poshan, Meghalaya ha Madan Kawang ha Ummulong, West Jaintia Hills mynta ka sngi ha ka jingiadon lang u Symbud Myntri Rangbah u Bah  Sniawbhalang Dhar.

Haba pynpaw halor ki jingeh kiba ki Muster Roll ki iakynduh namar ka jingbym ioh ia ki jingsiew ha ka por kaba biang, na ka liang u CM u la ong ba hadien ba ki la shimti ia ka sorkar ha u snem 2018, ki la don lypa ki jingeh kiba iadei bad ka jingpynslem ban siew ia ki tulop sha ki nongtrei Muster Roll na kiba bun ki daw, hynrei u la kular ban shimkhia  mardor ban weng ia kine ki jingeh.

U la ong ruh ba kane ka mat kaba iadei bad ka jingsiew biang por ia ka tulop ka dei kaba shem shitom namar ki don bun bah ki nongtrei Muster Roll ha ka jylla, bad kane ka jingeh ka dei kaba la slem bah, hynrei hadien ka jingiai buddien suki suki la nang lah ban weng ia ki jingeh bad mynta kiba bun na ki nongtrei Muster Roll ki la ioh ia ki tulop ha ka por kaba biang.

Haba pynpaw halor ka jingdonkam ban kiar na ki kam sain hima bad ban shim ia ki rai kiba phaikhmat sha ka bha ka miat jong ki paidbah, u CM Conrad u la ong ba ka jingshakri ia uwei pa uwei u nongshong shnong, kata naduh ki myntri sorkar haduh ki nongrep ki don ia ka juh ka jinglong kongsan.U la ong ruh ba ka thong jong ka sorkar ka long ban weng ia broh ki jingeh jong ki nongshong shnong.

Nalor kata u la ong ruh; “Haba ngi la shimti ia ka sorkar ki paidbah ki khmih lynti ia ngi ba ngin lah ban weng noh mardor ia ki jingeh kiba la don ha ka jylla mynta lah kumba 50 snem kynthih, bad kane ka dei ka mat ka ban kham shim por bad Ngan trei borbah ban kyntiew ia ka jylla Meghalaya da ka jingkyrkhu bad ka jingkyrshan jong ki paidbah.

Kham hashwa u CM ka jylla u la pynkup burom ruh ia u samla uba wan na ka longiing jong ki Muster Roll uba wan ha ka kyrdan kaba shakhmat ha ka eksam SSLC mynta u snem.

Nalor kata ka la don ruh ka jingpynkup burom na ka bynta u CM da ka seng ki Muster Roll halor ka jingkyntiew ia ka tulop bad honorarium.