Kular u CM ka Assam ban iatreilang bad ka Meghalaya halor ka jingjaboh ka lyer ha Byrnihat

Syllad | The Rising MeghalayaMarch 29, 2025

U Myntri Rangbah ka Assam u Himanta Biswa Sarma haka 28 tarik Lber u la kular ban ai ka jingiatreilang bad ka sorkar Meghalaya ha kaba iadei bad ka jingjaboh ka lyer ha Byrnihat.

“Ka Byrnihat kumba phi tip ka hap shapoh Assam bad Meghalaya, bad ka long kaba shisha ba ngi hap ban shim lang ia ka jingkitkhieh. Ngan iatreilang bad ka sorkar Meghalaya khnang ban pynthikna ba ka jingpynmih ia ka tdem jaboh kan kham duna,” ong u Himanta haba kren sha ki lad pathai khubor hadien ka jingai jingkren ha ka passing out parade kaba la long ha North Eastern Police Academy (NEPA).

Lah ban kdew ba na ka liang u Myntri Rangbah ka Jylla u Conrad K Sangma ha ka 13 tarik u Lber u la kular hapoh ka Iingdorbar ba ka Meghalaya bad ka Assam kin sa thaw iaka joint action plan ne iatreilang na ka bynta ban shim ia ki sienjam ban tehlakam halor kane ka jingjaboh ka lyer ha Byrnihat.