Kular u DHS iaka KSU ban thung doktor, nos bad pynbiang kali kit nongpang ha War Jaintia

Syllad | The Rising MeghalayaNovember 5, 2020

Ka Khasi Students’ Union War Jaintia Circle haka jingïalam u President Laitphar Syngkrem, u General Secretary Lurman B Talang bad kiwei kiwei ki dkhot haka 4 tarik une u bnai ki la leit ban ïakynduh ïa u Director Health Services (MI) Dr A War ban dawa pynbiang ïaki jingdonkam jong ki jaka ai jingsumar Primary Health Centre kiba hap hapoh ka Amlarem Sub-Division, West Jaintia Hills District.

Ïa kane jingdawa ka KSU War Jaintia Circle kala pynsngew hadien ba ka la leit ban jurip bad ïakynduh ïaki doktor ba dei peit ïaki PHC hapoh Amlarem Sub Division bad lap ba ka don ka jingdkoh bad jingduna ha kitei ki jaka ai jingsumar.

Ka KSU War Jaintia haka jingïakynduh ka la dawa ba dei ban thung sa uwei u doktor ha Jaraiñ PHC namar ïa mynta la don tang uwei hi u doktor bad kawei ka kali kit nongpang Ambulance na ka bynta ban suk ïaki nongpang ban poi kloi sha ki jaka ai jingsumar.

Ha katei ka jingïakynduh la pynsngew ruh ïa u DHS ïaka jingbym treikam ka kamra na ka bynta ki longkmie armet ne Labour Room.

U Dr A. War ula kular ban pynbiang ïaki jingdonkam jong ki jaka ai jingsumar da kaba phah sa uwei u doktor ha Jaraiñ PHC kumjuh ka Ambulance bad ban buh ruh ïaki 2 ngut ki nos ban ïarap haka Labour Room.

Ha kaba ïadei bad ka Pdengshakap PHC ula kular ban peit ban khmih ïaki jingdonkam ka PHC.

Ha kaba ïadei bad ka jingbym wan trei jong u nongñiah ka kali Ambulance ha Dawki PHC ka seng ka la dawa na u DHS ba dei ban weng kam ïa u bad ban thung da kiwei khnang ban ïoh jingïarap ki nongpang.

Ka Khasi Students’ Union War Jaintia Circle ka ka ai khublei kyrpang ia u DHS uba la kular ban shim khia bad pynbit pynbiang ïaki jaka ai jingsumar kiba don ha baroh kawei ka Amlarem Sub Division.