Kular u DMHO ban jurip iaka jingïap syiar ha kyrpong ka Khliehriat CHC

Syllad | The Rising MeghalayaJanuary 27, 2021

Ka Eastern Jaintia National Council (EJNC) Khliehriat West Unit haba buddien ïaka jingïap jong ki syiar jong u ma Vesper Lamare, ka la leit ban ïakynduh ïa u District Medical and Health Officer (DM&HO) ha ophis treikam jong u haka sngi Balang.

Ka EJNC haka jingleit ïakynduh ïa u DM&HO ka la ban jur ban bthah ïaki nongpynïaid jong kane ka CHC ban leit jurip ïaka jaka ri syiar jong u ma Vesper Lamare kaba don mar syndah bad ka Khliehriat CHC bad ban siew ïaka bai lutsan.

U DM&HO haba ïakynduh bad ki nongïalam jong ka EJNC ba kynthup ïa u President Shanborlang Bamon, u Diamon Bareh General Secretary bad ki katto katne ngut ki dkhot nongkitkam ula kular ban bthah ïaki doktor ka tnat Vertinary ban leit jurip ïa katei ka jaka ri syiar khnang ban lah ban pyntikna ïaka jingiap jong ki syiar.

Lah ban pynkynmaw hangne ba u ma Vesper Lamare na ka Shnong Khliehriat West ula ujor haka East Jaintia National Council (EJNC) Khliehriat West Unit haba ïadei bad ka jingïap ki syier jong u bad u kynnoh ba ka jingïap ki syiar jong u kadei naka daw jong ka um jakhlia kaba wan tuid na CHC sha ka jaka ri syiar jong u.

Shuh shuh ula kynnoh ba da ki spah tylli ki Syiar jong u kila ïap naduh ba ka um jakhlia umtngit jong ka Hospital ka wan tuid sha ki sem syiar jong u.

Kumta haka 22 tarik mynta u bnai ki nongïalam jong ka EJNC-KWU kila ïakynduh bad ka Dr Nidamon Pahoh kaba dei ka Medical Superintendent Khliehriat CHC kaba la kyntait ban siew ïaka bai lutsan jong u Bah Vesper Lamare.

Ka EJNC – KWU ka la kyntu ïa u DMHO ban pynkloi ïa katei ka jingjurip na ka bynta ka bha ka miat jong ki nongshong Shnong ka Khliehriat West.