Kular u Dolloi ka Jowai Elaka ban pyndam noh ia ka NOC ban seng karkhana coke ha Wapungskur

Syllad | The Rising MeghalayaApril 9, 2025

U Dolloi ka Jowai Elaka u Bah Puramon Kynjing ha ka 9 tarik Iaiong u la kular ban pynduh pyndam noh ia ka No Objection Certificate (NOC) ba la ai sha ka kompeni Om Om Coke na ka bynta ban seng ia ka karkhana coke hapoh u pud u sam jong ka shnong Waspungskur ha East Jaintia Hills, bad ruh ban pynmih ia ka hukum kaba bthah ia u Rangbah Shnong ka Mookhep ba ma u ruh un pynduh noh ia ka NoC kaba u la ai sha kane ka kompeni.

Ia kane ka jingkular u Dolloi u la ai hakhmat ka kynhun ki nongialam ka Dorbar Shnong Waspungskur ha ka jingialang kaba la long ha Jowai.

“Mynta ka sngi ngi la iakynduh ia u Dolloi ka Jowai Elaka bad ngi sngewkmen shibun ba ngi la ioh ia ka jubab kaba sngewtynnad na u. U la kular ha ngi ba un sa phah da ka shithi ban bthah ia u Rangbah Shnong ka Mookhep ba un pyndam noh mardor ia ka NOC ba u la ai na ka bynta ban seng ia ka karkhana coke hapoh u pud u sam jong ka shnong Waspungskur,” ong u Rangbah Shnong ka Waspungskur u Bah Postling Dkhar hadien ka jingialang.

U la pyntip ruh ba ka Dorbar Shnong ka la leit iakynduh ruh ia u Deputy Commissioner ka East Jaintia Hills ha ka 4 tarik Iaiong ha kaba na ka liang jong u u la thoh mardor sha ki tnad bapher bapher ba kin pynsangeh shwa ia baroh ki kam kiba iadei bad kane ka jingthmu ban seng ia ka karkhana coke ha Waspungskur kat bym pat lah ban pynbeit ia kane ka kam.

“Watla katta, ngi kwah ban pynthikna ba watla la lah ban pynbeit ia kane ka kam, hynrei ngin ym shah da lei lei ruh ban seng ia kino kino ki karkhana coke hapoh u pud u sam jong ka shnong Waspungskur,” on u Bah Dkhar.

Da kaba pynpaw ba kam don satia kano kano ka jingiakajia pud hapdeng ka shnong Mookhep bad ka Wapungskur, u Bah Dkhar u la ong, “Baroh kine ki artylli ki shnong ki don ia ki pud ki sam kiba thikna. Hynrei, la iohi ba ka jaka ba la thmu ban seng ia kane ka karkhana coke ka hap hapoh u pud u sam jong ka shnong Wapungskur.”

Nalor kata, une u Rangbah Shnong ka Waspungskur u pyntip ruh ba u Chief Forest Officer (CFO) ka Jaintia Hills Autonomous District Council (JHADC) ruh u la kular ia ka kynhun jong ka Dorbar Shnong ba ia ka NOC bad ka jingai jingbit ba la ai da ka Council yn pynkut noh namar ka Om Om Coke ka la pulom ban aiti ia ki kot ki sla kiba biang.

Kham hashwa kane, kane ka kynhun ka la leit mudui ruh sha ka Meghalaya State Pollution Control Board (MSPCB), kaba ha ka 7 tarik u Lber ba la dep ka la ai ia ka jingbit Consent to Establish (CoE) ia ka Om Om Coke na ka bynta ban seng ia ka LAM Coke Manufacturing Unit kaba shi shimney ha Thlakuru, Mookhep lyngba ka project kaba kot T.4.50 klur.

Na ka liang u Member Secretary ka MSPCB dang shen u la kular ia ka kynhun ki nongialam shnong na Waspungskur ba kan pynlong ka jingleit jurip sha katei ka jaka hashwa ba shim ia ka rai ha kaba iadei bad kane ka phang.