Kular u Dy CM ban iarap 5 lak tyngka ia ka Khanduli Secondary School, jurip iaka iew Mynsngat

Syllad | The Rising MeghalayaAugust 5, 2024

U Symbud Myntri Rangbah ka Jylla bad MLA ka Nartiang u Bah Sniawbhalang Dhar ula kular ban synniang T.5 lak sha ka Khanduli Secondary School.

U Symbud Myntri Rangbah ula rai ban synniang T.5 lak hadien ba ki nongialam ka shnong Khanduli bad ka bor pyniaid skul kila ai da ka memorandum ha kaba iadei bad ka jingeh ba iakynduh ka skul naduh ban tei iaka ïing skul, ka lynti iaidkjat bad ka tulop ki nonghikai kaba la kynjoh 4 lak tam haka shi snem.

U Bah Sniawbhalang uba la hiar sha kane ka shnong haka 3 tarik Nailar ula plie iaka fete jong ka dorbar shnong Khanduli, kaba la pynlong na ka bynta ban pynmih pisa ia kane ka skul kaba la kyntiew kyrdan naduh u snem 2015.

U Symbud Myntri Rangbah ula jurip ruh iaka iing skul kaba la seng da ka dorbar shnong Khanduli haryngkat ka jingiadonlang ki nonghikai bad ki nongialam shnong.

Ha kane ka juh ka sngi Bah Sniawbhalang ula hiar jurip ruh iaka iew ha Mynsngat, kaba ju pynlong iew ha man la ka sngi iew Muchai. Kane ka iew kaba dang shu sdang thymmai ha u snem 2022.

La synrang lang ia u Symbud Myntri Rangbah da ki nongialam shnong bad ki riew rangbah jong ka thain.

Kane ka iew ka hap hapoh ka jingpeit jong ka Jaintia Hills Autonomous District Council (JHADC).

Ha ka jingleit jngoh, u Symbud Myntri Rangbah u la ioh lad ban ia syllok bad ki nongshong iew, ban sngap ia ki jingeh jong ki bad ka jingai jingmut kumno ban pynbha shuh shuh ia kane ka iew.

U Bah Sniawbhalang Dhar, u la ong ba ka 1 Nartiang Constituency ka long kaba don bok shibun eh namar ka don 6 tylli ki iew, bad kane kala plie lad ia ka nongshong shnong ban khaii ka pateng bad ban kyntiew iaka lad kamai jakpoh jong ki.