Kular u Dy CM ban pynbiang ia ka jingpahara kaba khlain hapoh NEHU Campus

Syllad | The Rising MeghalayaApril 26, 2025

U Symbud Myntri Rangbah ka Jylla uba khmih ia ka Tnad kam Pohiing, u Bah Prestone Tynsong haka 25 tarik Iaiong u la kular ban pynbiang ia ka jingpahara kaba khlain hapoh ka campus jong ka skulbah North Eastern Hill University (NEHU) hadien ka jingjia shah thombor jong uwei u nonghikai.

Haba kren sha ki lad pathai khubor, u Bah Prestone u la ong ba ka ain kan shim ia la ka jong ka sienjam pyrshah ia kito kiba donkti ha kaba thombor ia u Assistant Professor jong ka Department Hindi hapoh NEHU.

“Nga la dep ban bthah ia u Superintendent of Police (SP) bad ki bor ban pyntreikam ia ka ain ban pynthikna na ka bynta ka jingshngain bad ki lad jingiada bad ba ka campus jong ka skulbah baroh kawei kan long kaba shngain,” u la ong.

Haba kylli halor ki jait jingiada ba la shim, u Bah Prestone u la ong, ” Balei ngan iathuh iaphi? Nga ong ha phi ba ngi la pynbiang ia ki lad jingiada ba pura. Kumta ngam tharai ba ngan batai bniah sha phi namar ka dei ka kamram jong ka sorkar jylla ba kan pynthikna ia ka jingshngain jong baroh, kata la ka long na ka bynta ki samla pule, ki nonghikai bad kiwei pat.

Haba kyntu ia baroh kiba sngewkhia ba kim dei ban khuslai, u Symbud Myntri Rangbah u la ong, “Sngewbha ban nym don ia kano kano ka jingsyier jingsheptieng namar ia mynta hi na ka liang ka sorkar ngi la dep ban pynkhlain ia ki bor pahara bad ngin pynthikna ba baroh kin long kiba shngain, kata kito kiba sah ne kiba leit shapoh ka campus jong ka NEHU.”

Na ka liang utei u nonghikai u Dr. Alok Singh u la dep ban mudui da ka ejahar pyrshah ia u president ka NEHUSU u Sandy Sohtun lem bad san ngut kiwei pat halor ka jingkynnoh donkti ha kaba thombor ia u hapoh ka ophis treikam jong u ha ka janmiet jong ka 24 tarik Iaiong.