Kular u Dy CM ban pynkhlain ia ka jingpahara ha ki jaka khappud

Syllad | The Rising MeghalayaApril 26, 2025

U Symbud Myntri Rangbah ka Jylla uba khmih ia ka Tnad kam pohiing, u Bah Prestone Tynsong ha ka 25 tarik Iaiong u la ong ba ka sorkar ka iengskhem ban pynthikna halor ka jingshngain kaba pura ha ki thain khappud.

Haba kynthoh halor ka jingjia kam thombor lehnoh kaba dang shen ha Pahalgam bad halor ka jingdonkam ban pyrkhing ia ka jingwan rungtuh shapoh ka ri, u Bah  Prestone u la ong, “Ngi la dep ban shong jingialang bad ki heh shipai ka Border Security Force (BSF) kumjuh bad baroh ki bor ba dei khmih, la ka long ki  bor jong ka sorkar jylla ne sorkar pdeng. Ngi don ha kajuh ka rukom pyrkhat bad ka nongrim. Ngin pynthikna ba ki jaka khappud jong ka ri ki dei ban long kiba shngain pura khnang ban lah ban iakhun ia baroh kine ki jingeh la ha kano kano ka rukom, ne ka jingwan rungtuh, ngi la dep iakren bad ngi la pynkhreh pura ia ki jingtreikam ha kaba iadei bad ki jaka khappud.”

“Ym tang katta, ngi la dep ban iatreilang ryngkat bad ki bor shnong ne ki VDP kynthup ia ki BSF, ki pulit lem bad kiwei ki kynhun ka sorkar pdeng la ha kano kano ka rukom bad ngin pynthikna ba kan ym don kano kano ka jingwan rungtuh,” u la bynrap.

U Symbud Myntri Rangbah u la kdew ruh halor ka jingmih khubor bad ong ba ki la don katto katne kiba wan rungtuh kiba la shah kem noh, kiba la shah pynngat bad shah set along katkum ki kyndon ka Foreigners’ Act.

Ha kaba iadei bad ka jingshah kem jong uwei u samla na Umlyngka namar ki jingkyrshan ia ki lehnoh kiba thombor ha Pahalgam lyngba ka social media, u Bah Prestone u la ong, “KI pulit ki la shim mardor ia ki sienjam namar ngi sngewkhia shibun ia kine ki jingthoh jong une u khynnah kaba long pyrshah ia ka ri. Kan ym ktah tang ia ka Meghalaya hynrei ia ka ri baroh kawei, bad khamtam ruh kan pynshlur ia kiba kum kine ki jingleh beain bad ki ban buh jingma ia ka shongsuk shongshngain hapdeng ki nongshong shnong ka jylla bad ka ri hi baroh kawei. Kumtangi la shimkhia halor kane ka mat da kaba shim mardor ia ki sienjam.”

“Ka jingkyrpad ka jong nga ia ki nongshong shnong ka jylla bad ka ri baroh kawei, to ngin iatylli lang kawei bad ngin ym ailad ia kino kino ki kam ialeh pyrshah ri ba kin ban wan biang ha ka ri baroh kawei,” u la kyntu.

Ki pulit ki la kem noh ia une u briew uba kyrteng u Simon Shylla 30 snem rta napoh ka iingsah jong u ha Umlyngka ha kaba ki la kurup noh ruh ia artylli ki mobile phone bad register case ia u hapoh Lumdiengjri PS ha ki kyndon Case No 421(04) 2025 U/s 113(3)/196(1)(a)/147 BNS.

La kem noh ia une u samla hadien ba la ioh ia ki jingtip na kiba bun balang ba uwei u briew uba kyrteng u ‘Man Shylla’ u la kynthoh pyrshah ia ka ri ha ka video ba la pynmih da ka Northeast Live ha kaba iadei bad ka jingthombor jong ki lehnoh ha Pahalgam da kaba kyrshan ia ki lehnoh ha ka kam pyniap ka jong ki bad kyntu ia ki lehnoh ba leh ia kiba kum kine ki kam thombor pyrshah ia kawei ka jaidbynriew ha ka thain Shatei Lammihngi lyngba ka Facebook jong u kaba la ai kyrteng ‘Man Shylla’ kaba buh jingma ia ka jingiatylli bad ka jinglong ryntih jong ka ri.