Kular u Dy CM ban pynkylla ia ka Iew Pynursla kum ka Police Bazaar; ther ia ki MLA ba kynthoh Sorkar

Syllad | The Rising MeghalayaFebruary 18, 2025

U President ka National People’s Party (NPP) Meghalaya bad Symbud Myntri Rangbah ka Jylla, u Bah Prestone Tynsong u la kular ba ka party NPP ka kut jingmut skhem na ka bynta ban kyntiew ia ka roi ka par ha ka thain Riwar bad pynthikna ruh ban pynkylla dur ia ka Iew Pynursla kum kawei pat ka Police Bazaar ne Khyndailad hapoh u 2028.

U la ther ruh ia ki katto katne ki MLA ki bym shym la wan tied ia ka  jingkhang Secretariat na ka bynta ki kam pynroi ha la ki jong ki constituency, hynrei kiba kloi pat ban kynthoh ia ka sorkar halor ka jingleh shiliang khmat.

Haba aijingkren ha ka jingialang ialap elekshon ban pan jingkyrshan ia ka MDC ba mynta na Nongshken ka Kong Grace Mary Kharpuri bad u kyrtong na Langkyrdem-Laitkroh u Bah Rahboklang Tynsong ha Pynursla haka 17 tarik Rymphang, u Bah Prestone u la ong, “Ngi la kut jingmut skhem ban wanrah shuh shuh ia ki kam pyntoi hapoh ka constituency, ha ka thain Riwar bad ka Jylla hi baroh kawei. Ngi kwah ban shna ia ka jaka pynieng kali kaba paka da kaba pynkynriah ia ka ophis PWD sha kiwei pat ki jaka bad ngi npynkylla ia kane ka jaka kum kawei pat ka Police Bazaar. Kan long da shisha ka jingkyrkhu kaba khraw ia ka thain Riwar. Nga kular ba hapoh u 2028, ngin pynthikna ia ka jingkylla kaba pura ia kane ka jaka.Kane kan urlong da ka jingiatreilang ryngkat bad ki Dorbar Shnong.”

U Bah Prestone u la pynpaw ruh ka jingsngewkhia halor ki jingkynnoh pyrshah ia u bad ia ka sorkar jong u ha ki rynsan social media bad ong ba wat hapdeng ka jingpyrshang ban pynsaphriang ia ki jingpyntip ba bakla da ki liang pyrshah, hynrei ki paidbah ka thain Pynursla kim dei satia ki briew kiba suk ba kin pynngop ia ki.

“Ki paidbah ka Pynursla ki dei ki briew kiba donburom bad dei namar jong phi nga long kumne kumba nga long mynta. Kumta ruh nga kyntu ia ki paidbah ka constituency jong nga ba kin ai ka jingkyrshan kaba pura ia I Kong Grace Mary Kharpuri bad ia u Rahboklang Tynsong bad ban pynthikna ba kine ki arngut kin ioh ia ka jingjop khnang ba kin long ka kti ka mon ka kti ka diang jong nga ban trei na ka bynta ki kam pynroi hapoh ka constituency,” u la ong.

U la ong ruh, “Ka long kaba shisha ba ki don khyndiat eh ki skhim ha ki ADC hynrei kata ka biang beit namar da ka jingiatreilang ka jong ki ryngkat bad nga ki skhim kin wan tuid kum ka duriaw hapoh ka constituency. Kumta phi dei ban pynthikna ba baroh arngut ki kyrtong kin ioh ia ka jingjop ha kane ka elekshon ADC.”

Nalor kata u Bah Prestone u la kam ruh ba ki liang pyrshah kim lait ang shuh hadien ba ka sorkar ka la pynthikna ban wanrah ia ka mini-Secretariat ha Pynursla bad ong, “Nga kut jingmut skhem na ka bynta ka roi ka par jong kawei pa kawei ka shnong hapoh ka constituency. Hadien ba la dep ia ka surok Two Lane, kan long da shisha ka jingkyrkhu kaba khraw ia ka thain Riwar. Ngi long kiba donbok ba ngi ia don lang ha ka sorkar. U Blei U la kyrkhu ia ka Langkyrdem constituency kaba rim, Pynursla constituency namar nga ioh bat ban don ha ka shuki hapoh Secretariat naduh ba iakhun elekshon. Kane ka dei ka samoi kaba san jong nga bad phi lah ban khmih lynti ba bun kiba bishni. KI don bun ki jingpyrshang ban tan ia ngi shapoh hynrei ngim ju ailad ia ki da lei lei ruh.

Ha kaba iadei bad ki jingkynnoh jong ki liang pyrshah ba ka sorkar ka leh shiliang, u Bah Prestone u la ong, “Kumno phin lah ban kynnoh ba nga leh shiliang haba ngam ju iohi ia phi ban wan iakynduh ia nga hapoh ka kamra jong nga? Lada phi kwah kam pynroi, wan sha Secretariat bad kyrpad ia u Bah Prestone ban iarap ia phi.”

Nalor kata u la ther ruh ia kawei ka party sain pyrthei kaba ong ba tang ka jingieid ia ka jaidbynriew ka la biang bad ba ki briew kim donkam satia ia ki kam pynroi, katba ha kajuh ka por ki la ai ia ki jingkular sha ki ha ka por elekshon.

Shuh shuh u la ong, ““Ka dei ka kamram jong uwei pa uwei u MLA ne MDC ban wan tied ia ka jingkhang jong ka Secretariat na ka bynta ki kam pynroi hapoh la ki jong ki constituency. Hynrei, ka long kaba sngewsih ba katto katne na ki MLA kim shym la leh ia kata bad kane ka la ktah jur shibun ia ka constituency jong ki khamtam eh ia u paidbah nongshong shnong.”