Kular u DyCM ban pynioh da ki surok ba bha ban kyntiew ia ki kam jngohkai ha ka thain Sohra

Syllad | The Rising MeghalayaFebruary 19, 2025

U President ka National People’s Party (NPP) Meghalaya bad Symbud Myntri Rangbah ka Jylla, u Bah Prestone Tynsong u la kular ban pynioh da ki lynti surok kiba bha ha ki shnong bapher bapher hapoh Sohra constituency khnang ban kyntiew shuh shuh ia ka kam jngohkai bad ki ban long ka jingkyrkhu ia ki paidbah ka thain.

Ha ka jingkren ialap elekshon ban pan jingkyrshan ia u MDC barim u Bah Donevan Wanlang ha ka shnong Khrang, Sohra ha ka 18 tarik Rymphang, u Bah Tynsong u la ong, “Nga kyntu ia ki paidbah ka constituency ba kin ieng tylli kawei ban vote ia u Bah Wanlang khnang ban nanglah ban pynkhlain ia u MLA ba mynta u Bah Gavin M Mylliem, kan nangpynkhlain ia nga kum u Symbud Myntri Rangbah bad ruh kan nangpynkhlain ia u Myntri Rangbah na ka bynta ban wanrah shibun ki kam pynroi sha ka thain.”

“Ngi kular ba ngin shna ia ki surok ba paka na ka bynta kiba buntylli ki shnong ki bym pat don ia ki surok kiba bha.Kumta, lada phi pynjop ia u Bah Donevan kan kham pynsuk shibun ia nga ban treikam,” u la bynrap.

Kumjuh haba pyntip ba ka sorkar shen kan sa pyntrei noh ia ka jingkieng halor jong ka wah ka ban pyniasoh ia ka shnong Kongthong bad ka Khadarshnong bad Wahkhen, u Bah Prestone u la ong, “Ngi la dep ban mang ia ka pisa bad ka jingpyntrei  kan sa sdang noh shen bad hadien ba la dep, ki nongshangkai ki lah ban iaid sha Wahkhen.”

U la ban jur ruh halor ka jingdonkam ba ki kali ki dei ban lah ban iaid lyngba na Swer sha Wahkhen sha Pomlum bad Khadarshnong bad ong, “Nga la kyntu ia u Sordar Shnong ka Raid Wahkhen bad Khadarshnong ba kin pynioh jaka ban pyntrei ia ka project.”

“Kumta, ka long kaba kongsan ban jied ia u MDC bad MLA na kajuh ka party khnang ba kin lah ban iatreilang bad ka sorkar na ka bynta ka jingmyntoi jong ka constituency,” ong u Bah Prestone haba kyntu ia ki paidbah ba kim dei ban shah ialam bakla ha ki jingkynnoh bym shisha ba ka NPP ka dei ka party Garo.

“Ha ka jingshisha, kam dei satia ka party Garo, nga dei u president ka Jylla bad u Conrad K Sangma u dei u Myntri Rangbah bad National President.Sngewbha wat ngeit ia ki jingkynnoh,” u la ong.

Haba kren ha ka jingialang, u Bah Donevan u la ong ba u la long teng u MDC na ka Congress naduh u snem 2014 haduh 2019, bad ha u 2018 u la shah rem ha ka elekshon MLA pyrshah ia u MLA ba mynta u Bah Gavin M Mylliem. “Hynrei hadien ba la sakhi ia ka jingtrei shitom jong u MLA na ka bynta ka roi ka par jong ka constituency, nga la rai ban iehnoh kam na ka Congress bad kyrshan ia u ha u 2023.”

Shuh shuh haba kyntu ia ki paidbah ban ai ka jingkyrshan ia u ha kane ka elekshon MDC ka ban wan, une u MDC barim u la ong, “Hadien ka jingpynliem ia u MDC ka Sohra u Bah Titosstarwell Chyne jong ka UDP da 1500 vote ha u snem 2014, bad kum u MDC, nga la mad ia shibun ki jingeh namar ba kam don ka jingiasngewthuh jingmut hapdeng jong nga bad u MLA barim ka Sohra.”