Kular u James ban kyntiew kyrdan ia ka Health Sub-Centre ka Sohryngkham

Syllad | The Rising MeghalayaSeptember 24, 2021

U Myntri ka tnad ka Koit ka Khiah u James PK Sangma haka sngi Thohdieng ula la leit jurip dalade iaka Sohryngkham Health Sub Centre bad ula kular ban kyntiew kyrdan ia kane ka jaka sumar sha ka Primary Health Centre.

Ha kane ka jingjurip la iadonlang u MDC ka Sohryngkham, Bah Pynïaid Sing Syiem uba dei u Chairman ka KHADC.

Kane ka jingkular u Myntri ka ṭnad ka koit ka khiah kala ai mynsiem iaki nongshong shnong bad ki kyrmen ba kan urlong kane jingthmu kaba kila dawa la kham slem.

“Ngan sa shim ia kane kum ka mat kaba ha khmat eh bad hapoh kane ka samoi trei ngin sa pynurlong na ka bynta ban kyntiew kyrdan noh ia ka Health Sub-Centre sha ka kyrdan Primary Health Centre”, ong u James K Sangma.

U Bah Pyniaid Sing Syiem u la ong, “Naduh u snem 2008 ki paidbah bad ki nongialam shnong kila angnud ban kyntiew kyrdan ia kane ka jaka sumar bad na ka liang u Myntri ka tnad ka koit ka khiah (James K Sangma)  tang shu ioh bat ia ka kam kum u Myntri ba dei peit ia ka tnad ka koit ka khiah u la kwah wan hi dalade sha Sohryngkham”.

U Pyniaid u la iathuh ba ki nongialam shnong kila dep ban ai ia ka kot jong ka jaka na ka bynta ban tei ia ka PHC sha ka ophis u DHS. “Nga ruh kum u nongmihkhmat ngan buddien ia kane ka jingangnud kiba ki paidbah ki la pynpaw khnang ba kan long ka jingmyntoi ia uba bun balang ha kaba ia dei ban ïoh jingshakri na ka tnad ka koit ka khiah ka Sorkar Jylla”, u la ong.