Kular u kyrtong RDA ban buddien ia ka Ktien Khasi, ILP; Ka Jylla ka la hiar sha trai ong u kyrtong VPP

Syllad | The Rising MeghalayaMarch 19, 2024

Ki kyrtong ki ban ia aireng ha kane ka Lok Sabha ilekshon napoh Shillong seat ha ka 18 tarik mynta u bnai ki la wan iashim bynta ha ka Symposium halor ka mat ‘Parliamentary Politics and Political Participation” ia kaba la khot pynlong da ka Sankardev College ha Shillong.

Kine ki kyrtong ki kynthup ia u kyrtong ka Regional Democratic Alliance (RDA) u Bah Robertjune Kharjahrin, u kyrtong ka Voice of the People Party (VPP) u Dr Ricky AJ Syngkon bad u kyrtong shimet u Prof Lakhon Kma. Nalor kata la wan iashim bynta ruh da u Secretary ka Congress u Emanuel Badwar bad u nongaiktien ka BJP u Bah M Kharkrang.

Hynrei, na ka liang u MP ba mynta ka Congress u Bah Vincent H Pala bad ka kyrtong ka NPP kaba dei ruh ka Myntri sorkar ka Kong Ampareen Lyngdoh kim shym la wan iashim bynta ha kane ka jingialang.

Ia ka ilekshon sha ka Lok Sabha kaba 18 yn pynlong ha ka 19 tarik Iaiong 2024 ha Jylla Meghalaya.

U kyrtong ka RDA u Bah Robertjune ha ka jingkren u la pynthikna ia ki paidbah ka thain Ri Lum Khasi jaintia ba lada un shah jied kum u MP un bteng ban buddien bad ka sorkar Pdeng na ka bynta ban pyntreikam mardor ia ka Inner Line Permit ha Meghalaya. U la ong ruh ba ka nongrim jong RDA ka long ban iada na ka bynta ka bha ka miat jong ki trai ri trai muluk bad ki nongshong shnong ka Jylla.

“Ka thong ka jong ngi kalong ban pyntreikam ia ki laitylli ki PS, kata Protect ne ban iada, Preserve ne pynneh pynsah bad ban Promote ne ban kyntiew, bad ban pynurlong ia kane ngi donkam nyngkong eh ban iada ia lade, bad dei na kata ka daw ngi kwah ban pynthikna sha phi ba lada phin jied ia ka RDA, ngin sa pynsngewthuh ia ka sorkar na ka bynta ban pyntreikam ia ka ILP ha Meghalaya.

Haba kular ban aijingiada bad burom ia baroh ki jait niam bapher bapher ha ka ri India, u Bah Kharjahrin u la ong, “Ngin pynthikna halor ka hok mane blei kum ka hok tynrai jong uwei pa uwei bad ba kane kan iai neh hapoh ka ri India.Ngin ym ailad iano iano ruh ba kin iuhroit halor kine ki hok.”

Nalor kata u la ong ruh ba ka RDA kan bteng ban buddien bad ka sorkar Pdeng na ka bynta ban pynkloi ban pyrnung ia ka Ktien Khasi ha ka khyrnit ba phra jong ka Riti Synshar jong ka Ri India bad ruh halor ka kam iakajia pud hapdeng ka Meghalaya bad ka Assam da kaba bishar bniah biang ha kaba iadei bad ka soskular ba la ia pynbeit ha ka kylla kaba nyngkong hapdeng kine ki ar jylla.

Une u kyrtong ka RDA u la ong ruh ba un kyntu ia ka sorkar Pdeng ba kan bishar biang ia ka kam iapynbeit pud hapdeng ka India bad ka Bangladesh khnang ban iada ia ki hok jong ki trai shnong. U la ong ruh ba ka RDA kan iakhun na ka bynta ban pynkhlain shuh shuh ia ka Sixth Schedule ba la pynkupbor da ka Riti Synshar khadar jong ka Ri India khnang ban aijingiada ia ki trai shnong riewlum bad ia ka kolshor.

Haba kren ha ka liang ka roi ka par, u kyrtong ka RDA u la ong ba un pynthikna ba ka Office Memorandum kaba kur 44% ka bha thungkam thung jam ia ki ST ha ki tnat sorkar kin treikam kumba la buh beit bad ruh ban pyntreikam ia ki economic zone bad ban pynthikna ba ha ka liang ka ioh kam ioh jam kaba 100% ia ki trai shnong ha ki Group C bad D.

Katba na ka liang u kyrtong shimet u Prof Lakhon Kma u la ong ba u la pyrkhat sani bha hashwa ba un shim ia ka rai ban mih iakhun ha kane ka ilekshon MP ban mihkhmat ia ki paidbah nongshong shnong jong ki 7 tylli ki district ka thain Rilum Khasi bad Jaintia sha Parliament.

 U la ong ba um sngew iahap halor ki nongrim jong ki seng sain hima bapher bapher ha ka Jylla bad pynkynmaw ba bun na ki MP napoh Shillong seat ki dei ki kyrtong shimet. U la ai nuksa ruh ia u Bah GG Swell uba la jop haduh saw sien ia ka ilekshon MP kum u kyrtong shimet da kaba pynrem ia ka seng Congress bad seng riewlum.

Haba kynthoh ia ka sorkar ba la ialam da u Narendra Modi hapoh Delhi, u Prof Kma u la ong, “Nga sngew ba lada ka BJP kan wanphai biang ha ka por, Ngam tip kaba kum kano ka jingkylla kin wanrah. Wat ialehkai bad ki riti synshar khadar jong ngi. Katba phi dang burom ia ka riti synshar ngi dang dei kawei ka ri. Nga don hapoh ka university bad Nga iohi kiba kum kino ki jait briew ba la phah shapoh university, ka dei ka juh ka jingmut jingpyrkhat kin ban jia sha baroh ki jaka bad Nga sngewkhia jur halor kane.”

“Phi donkam ban phah ia ki briew kiba lah ban ieng marwei hapoh iingdorbar bad ban bthah ia ka sorkar ba kan sngewbha ban ym ialehai bad ki riti synshar khadar ri namar kane ka riti synshar ka tehsong ia ngi kum kawei ka ri.Ka sngi kaba phi ialehkai bad ka riti synshar, kane ka ri kan sa pait sa pra lyngkhot bad na kata ka daw kim dei ban ktah ia ka nongrim ban pdiang bad burom ia baroh ki jait niam hapoh ka ri,” u la bynrap shuh shuh.

Katba u kyrtong ka VPP u  Dr Ricky AJ Syngkon u pynpaw ka jingsngewkhia kaba jur halor ka jinglong jingman kaba mynta hapoh Meghalaya, kata wat hadien 52 snem ba ka la ioh la ka jong ka Jylla kaba pura. Haba pynpaw halor ki kaiphot lyngba ki tnat bapher, u la ong, “Ka long kaba sngewsih bad sngew bynniaw jur ba ka Meghalaya ka dei ka Jylla kaba duk tam.Ka Nongbah Shillong kaba shisien la tip kum ka pdeng ha ka liang ka pule puthi, hynrei shaei ngi don mynta ngi la don shatrai eh. Ha ka liang ka koit ka khiah ruh ngi la nang hiar sha trai duh, u la ong.

Katba na ka liang u nongaiktien ka BJP u Bah M Kharkhrang, ula kren halor ki skhim bapher bapher bala pyntreikam da ka Sorkar Pdeng, bad u la ong ruh ba ka Sorkar Pdeng kala wanrah ia ka prokram Nasha Mukt Abhiyan ban iakhun pyrshah ia ka jingjyllei u drok kaba la ktah jur ia ki samla jong ka thain Shatei Lam mihngi bad ka Ri hi baroh kawei.