Kular u Ma Pala ban pynbha ïaka madan Kiang Nangbah

Syllad | The Rising MeghalayaNovember 12, 2019

JOWAI: U MP Shillong Seat u Ma VH Pala uba la wan ïuhkjat haka sien nyngkong ha madan Kiang Nangbah Stadium kum u kongsan haka jingïakhun final jong ka ’12^th Kiang Nangbah Memorial Trophy’ kaba pynïaid da ka West Jaiñtia District Sports Association (WJDSA) ula kular ban pynbiang ïaki jingdonkam jong ka madan haka sngi Nyngkong.

U MP ula ong ba ka Rilum Jaiñtia kala paw bha haka jylla haka jingbun ki pleïar kiba don ka sap ïalehkai bad u sngewhun ban wan sakhi ïaka jingïalehkai ka Mynthong SC bad ka 7 Wasa Utd namar ba u ïohi dala ki jong ki khmat ïaka mynsiem ïalehkai ka jong ki pleïar kumjuh ka jingieit football jong ki paidbah kiba la pyndap smam ïaka madan.

“Nga la ïohi da la ki jong ki khmat ïaka jingduna ka madan bad nga la dep ong ruh ïaki nongïalam ka WJDSA ban pynbiang ïaki drawing bad estimate khnang ba un lah ban teh ki lad jingïarap na ka bynta ban pynbha ïaka madan ïalehkai lyngba ka MP skhim naduh ban pynbiang bad pynbha ïaki jaka shong paidbah bad ki kamra jong ki pleïar bad referee,” la ong u MP ka Jylla.

Ha kane ka jingïakhun final ka Mynthong SC kala jop da ka tie breaker da 4-3 ïaka 7 Wasa United bad rah ïaka Kiang Nangbah Memorial Trophy.