Kular u MLA Jowai ban ai Shi Lak iaki skul ba jop Subroto Mukherjee Cup

Syllad | The Rising MeghalayaAugust 7, 2023

“Katba nga dang long u MLA ngan synñiang Shilak tyngka ïa kino kino ki skul hapoh ka Constituency jong nga, kiba lah ban wanrah ïaka nam lahduh haka lympung ialehkai State Level Subroto Mukherjee Cup”.

Ula MLA Jowai u Ma Wailadmiki Shylla ula pynbna ia kane khusnam haka jingialang pynkup burom iaki 16 ngut ki khynnah ialehkai Under-14 Boys jong ka HKSingh Memorial Secondary School kiba la wanrah nam ïaka skul bad ka District haka lympung ïalehkai State Level Subroto Mukherjee Cup Football Tournament ba la pynïaid da ka Directorate of Sport & Youth Affairs.

Kine ki khynnah ialehkai HK Singh Memorial Secondary School ki la khur ïaka nam lahduh hadien ba ki la pynliem ïaka KB Memorial Secondary School kaba na East Jaintia da 4-1 lyngba ka ïashut Tie-breaker kaba la long ha nongbah Shillong dangshen.

Ban ai mynsiem ïa kine ki khynnah ialehkai kane ka skul, ki bor pynïaid jong ka skul HK Singh Memorial Secondary School, Jowai ki la pynlong ka jingïalang pynkup burom kaba la wan sakhi lang da u kongsan u MLA u Wailadmiki Shylla, ka District School Education Officer ka Kong A. Syiem, ki MDC ka JHADC, u District Sports Officer West Jaintia u Khroobok Passah, ki dkhot ka WJDSA kiba kynthup ia u EMH. Passah, u Lammat o. Laloo, u Patrick Lamare, ki shakri niam ka Balang Unitarian, ki nonghikai, ki kmie ki kpa bad ki khynnah skul.

U Wailadmiki Shylla haka jingkren ula ong, “Katba nga dang long u MLA ngan synñiang shilak tyngka ïa kino kino ki skul hapoh ka Constituency jong nga, kiba rah ïaka nam lahduh haka State Level Subroto Mukherjee Cup bad leit mihkhmat sha ka National Level jong ka Subroto Mukherjee Cup”.

Ula pynpaw ka jingsngewkmen bad ai ka jingïaroh kaba kyrpang ïa kine ki khynnah kane ki ban leit mihkhmat ïaka Jylla haka jingïakhun ka ban long ha Bangalore ka ban sdang naduh ka 30 tarik Nailur (September) haduh 10 tarik Risaw (October) 2023.

Ula ai mynsiem ruh iaki ban ïalehkai bha bad ban trei shitom ban ïoh rah ïaka nam lahduh bad wanrah ruh ïaka nam ka burom ïaka skul, ka District bad ïaka Jylla.

Lahduh ka HK Singh Secondary School, Assam Rifles Public School bad Saiden Secondary School haka Subroto Mukherjee Cup

Haba ïakren bad u DSO u Khroobok Passah ula pyntip ba ka jinglut jingsep baroh na bynta ban leit ïashim bynta sha Bangalore yn pynlut hi na ka ophis jong u DSO.

 Shwa kane la ioh ka jingkren na u Headmaster u T. Passah haka jingïalang kaba la pynïaid da ka H. Shylla Assistant Teacher bad la pynshongshit ïaka jingïalang pynkup burom da ki jingrwai jingshad na ki khynnah kane ka skul.