Kular u Myntri ban aijingiarap sha kiba haiing u lanot ba khlad shah bat bording ha dam Umiam

Syllad | The Rising MeghalayaFebruary 23, 2024

U Myntri ka Tnat Bording Abu Taher Mondal ha ka 22 tarik Rymphang u la pynthikna ban siew ia ka bai lutksan sha kiba haiing hasem jong u nongap pahara uba la khlad noh na ka jingshah bat ha ka bording ilektrik hapoh sub station jong ka jingkieng dam Umiam Stage-1.

 “Da lade hi shimet Nga la rah ia kane ka kam bad ka MeECL bad pynthikna ruh ban siew ia ka bai lutksan sha kiba haiing hasem jong une u lanot,” ong u Mondal haba jubab ia ka call attention notice ba la wanrah da u MLA ka VPP na Mawlai, u Bah Brightstarwell Marbaniang hapoh ka iingdorbar thawain.

U la ong ba u (L) Kyrshanborlang Muktieh uba dei u nongap pahara miet uba trei bad ka  M/s ITD Cementation India Limited u la shah bat ha ka bording ha ka 29 tarik u Kyllalyngkot ba la dep, kata hadien ba u la iatyngkhuh bad u waiar ba don ding jong u transformer hadien ba u la leit ban rung hapoh ka substation.

U Mondal u la ong ruh ba u (L) Muktieh um dei satia u nongtrei jong ka Tnat MeECL hynrei u trei pat kum u nongai pahara bad ka kompeni kaba pyntrei, ka ITD Cementation India Limited kaba maramot ia ka jingkieng dam kaba dang iaid mynta shakhmat.

Nalor kata u la ong ruh ba katkum ka kaiphot jingtohkit da u senior electrical inspector la ong ba u Bah Muktieh la shem ba u la don hapdeng ka jingbym tip briew hapoh ka substation da ki bor pulit kiba don ha ka duty hapoh ka main dam kiba la pyntip noh mardor sha ki bor ba dei khmih jong ka ITD Cementation India Ltd.

La ong ruh ba ia ka daw ba thikna halor ka jingkhlad yn lah ban pynthikna tad hadien ba la ioh pdiang ia ka report na ki pulit bad medical officer.

Shuh shuh u Mondal u pyntip ruh ba na ka liang ka MeECL kum ka jingsngewlem para briew ka la kyntu ia ka M/s ITD Cementation (India Limited) ba ka dei ban pyllait noh kloi ia ka jingiarap pisa, kata kum ka  EPF (Employees provident fund) bad insurance sha kiba haiing hasem jong une u lanot namar ka jingkhlad noh hapdeng jong ka kam.