Kular u PM Modi ban kyrshan ia ka sorkar Meghalaya ban poi sha ka thong ha ki 5 snem ki ban wan

Syllad | The Rising MeghalayaDecember 15, 2023

U Myntri Rangbahduh ka Ri u Narendra Modi u la kular halor baroh ki lad jingiarap ia ka sorkar Meghalaya khnang ba kan poi sha ka thong ba la buh kaba kynthup halor ka jingpynkynriah ia ki ophis sorkar bad Secretariat shapoh New Shillong Township ha kine ki san snem ki ban wan.

Haba pyntip ia kane hadien ka jingiakynduh ia u PM Modi ha New Delhi haka 14 tarik Nohprah, u Myntri Rangbah ka jylla u Conrad K Sangma u la ong ba u la ioh ban pyntip sha u PM halor ki kam pynroi bad halor ka jingpyniaid shakhmat ia ki prokram bapher bapher jong ka sorkar hapoh ka jylla.

“Nga la aiti ia ka kaiphot kaba bniah bad nga la ai ruh katto katne ki jingpynshai ha u ha kaba u la pynpaw ia ka jingkmen ban iohi ia ki kam pynroi kiba la jia bad urlong ha ka jylla, bad u la kmen ruh ban iohi ba ki kam pynroi lyngba k mangtyngka ha kine ki san snem ka la kiew sha ka palat arshah, kata kaba long jan lai shah na kaba long ha ki 5-6 snem mynshuwa,” u la ong.

Kumjuh haba pynpaw halor ka jingiohi lypa ka jylla bad halor ki thong bapher bapher kiba la buh ban kynjoh ha kine ki san snem ki ban wan, u Sangma u la ong; “Nga la pan ia ka jingkyrshan bad ka jingtuklar lem na ka bynta jong ngi, ban btin lynti bad kyrshan ia ngi khnang ba ngin lah ban poi sha katei ka thong ba la buh na ka bynta kine ki san snem ki ban wan.”

Nalor kata u CM u la ong ruh; “Nga la pyntip ha u PM ia ka jingiohi noh ia ka New Shillong Township kaba ngi thmu ban rah ia baroh ki ophis treikam kynthup ia ka Secretariat kaba thymmai, kata da kaba batai ruh ia ka plan bad ki jingpynwandur bad pan ia ka jingkyrshan ban pynthikna ban pyniaid shakhmat ia kane ka projek. Na ka liang u PM u la pynpaw ia ka jingkmen ban iohi ia kine ki kam pynroi bad pynthikna halor baroh ki jingkyrshan na ka liang ka jong u.”

Na ka liang u CM ka jylla u la iakynduh ruh ia ka Myntri Pla Tyngka ka Sorkar Pdeng ka Nirmala Sitharaman bad kyrpad ia ka ba kan kyntiew ia ka bhah bad ban mang shuh shuh ia ki externally aided projects (EAPs) na ka bynta ka Meghalaya da kaba pynshong nongrim halor ka jinglah ban pyntreikam bha. U la ong ruh, “Nga la batai ia ka halor ki project bapher bapher kila iaid mynta lyngba ka Capital Investment Fund (CIF) ba ka Sorkar India kala ai sha ki Jylla bad lyngba ki EAP ba ngi pyntrei bad ruh ki kam pynroi bapher bapher kiba iaid ha Jylla.” Nga

Na ka liang ka Myntri Pla tyngka ka la ai ia ka jubab kaba sngewtynnad bad pynthikna ban iarap bad aijingkyrshan nalor ka jingkular ban kyntiew ha kaba iadei bad k bhah jong ka EAP.

 “Kumta ruh ngi phaikhmat halor ka jingkyrshan jong ki na ka Finance Ministry bad na u Myntri Rangbahduh ka Ri khnang ba ngin lah ban poi sha ka thong   kaba ngi la buh na ka bynta ka Jylla Meghalaya” ong shuh shuh u CM.