Kumba 36 ngut ki samla pule ka jylla ki dang sahkut ha Bangladesh; 80 ngut ki la wanphai; ong u CM

Syllad | The Rising MeghalayaJuly 20, 2024

U Myntri Rangbah ka Jylla u Conrad K Sangma ha ka 19 tarik Naitung u la ong ba ki dang don sa kumba 36 ngut ki samla pule MBBS ka Jylla kiba dang sahkut hapoh ka ri Bangladesh kaba don mynta hapdeng ka jingiakhih kaba jur.

U la ong ruh ba napdeng ki 405 ngut ki samla pule na India 80 ngut kiba dei na Meghalaya la lah ban pynkynriah noh ia ki na katei ka ri lyngba ka Dawki, West Jaintia Hills District. U la ong ruh ba kine ki samla kiba dang sahkut ki dei kiba pule ha Eastern Medical College.

Na ka liang u CM u la ong, “Mar ia ioh ia ka jingtip ia kane ka jingjia ha katei ka ri ba marjan mardor ngi la shim ia ki sienjam ha kaba la lah ban pynkynriah noh ia haduh kumba 405 ngut ki samla pule kiba dei na India napoh Bangladesh lyngba ka Dawki ha kaba na kine 80 ngut ki dei na Meghalaya. Napdeng kine ki don ruh ki samla pule kiba dei na Bhutan bad Nepal, bad ki don ruh kiba dei ki tourist kiba la sahkut bad kiba la jam ia ki jaka khappud na ka thain Dawki.”

Watla katta u Sangma u la ong ba ki dang don ka jingsngewkhia na ka bynta ki 36 ngut ki samla pule ka jylla kiba pule hapoh Eastern Medical College ia kiba ym pat shym la lah ban pynkynriah.

Halor kane u la pyntip ba na ka liang ka sorkar Jylla kala iakren khlem sangeh bad ka Indian Embassy ha Dhaka ba kin leit shaw ia kito ki samla pule kiba dang sahkut ha Bangladesh.

“Kumta nga kwah ban iasam bad pyntip sha baroh ki kmie ki kpa ba ngi iai bteng ban iakren, kata watla ka jinglong jingman hapoh bad sawdong jong ka kolej ka long kaba biang, hynrei ha ka lynti ka lah ban don kano kano ka jinglong jingman bad kumta kan ym long kaba lah ban khein sting. Tad haduh ba ngin da thikna bha ba ka lynti ruh ka long kaba shngain bad lah ban pynpoi ia ki da kaba suk sha u pud u sam, ngin hap ban peitngor ia ka jinglong jingman. Kumta kine ki kam ki dang iaid bad ngi dang bteng ban iamir jingmut bad ngi kyrmen ba hapoh kine ki 24 kynta ki ban wan ngin sa lah ban bishar bniah ia ka jinglong jingman,” ong u CM.

Haba pyntip ba bun na ki nongwanphai kin rung lyngba ka Tripura, u CM u la ong, “Kumta ngi la iakren  bad ki bor sorkar ka Tripura ruh kumjuh bad u High Commissioner jong ngi ha Bangladesh. Na ka liang ki ophisar jong ngi kila bteng ban iakren khnang ban gin lah ban pynkynriah noh mardor ia ki samla pule jong ngi bad kiwei pat na kane ka ri ba marjan.”

Nalor kata u CM u pyntip ruh ba ka sorkar ka la rai ban pynmih da ka online portal ban ioh ia ki jingtip kiba bniah kumjuh ban iakren bad baroh ki samla pule kiba dei na Meghalaya kiba pule shabar jong ka Ri. Katkum ka jingpynpaw ka jong u, ka sorkar ka la mad ia shibun ki jingeh ha ki snem kiba la leit noh namar ka jingbym don ia ki lad ban ioh iakren markhmat bad ki samla pule kiba pule shabar jong ka Ri.

U la ong ruh ba ia kane ka jingtyrwa yn sa rah ban iakren hapoh ka jingialang ka kynhun Myntri ban ai ia ka jingmynjur.