Kunai bha ïaki symbai tynrai: DC West Jaiñtia Hills

Syllad | The Rising MeghalayaJanuary 26, 2020

JOWAI: Ka sur kyllum kaba mih naka Rong Kba (Rice festival) kaba baroh ki ïamynjur lang ka long ba ka lawei ka shong ha ki symbai tynrai. Kane ka dei kaba khubor kaba mih naki nongrep kumjuh ruh ki nongtrei sorkar kiba la ïashim bynta haka tamsa khaw ne ka rice festival kaba la long haka 25 tarik u Kyllalyngkot haka shnong Mukhap.

Ka shnong Mukhap ka don marsyndah bad ka ophis jong u BDO ka Laskeiñ block bad ka jngai kumba laiphew kilometre eiei na ka shnong Jowai bad ha kane ka Rong Kba ki nongrep kiba long ki kynhun kiba la kyrshan da ka (SURE) Society for Urban and Rural Empowerment (SURE) bad ka North East Slowfood and Agrobiodiversity Soceity (NESFAS), Shillong kila wan rah ïa ki symbai khaw kiba ki nongrep ha kane ka thaiñ ki dang ïa pyndonkam haduh kine ki sngi. Ha kane ka sngi ki kynhun kila wan ruh ban ïashimbynta ha kaba die ïa ki jingbam kumjuh ki jingdih tynrai khamtam kito kiba shna na u khaw.

Haka jingïalang ban plie ïa kane ka Rong u Garod LSN Dykes uba long u DC jong ka West Jaiñtia Hills ula phaidien shala ka jinglong khynnah samla bad kynmaw ba ïalade ruh u sheit rep haka por shuti bad u kubur bad ka jingong jong kiwei pat ki nongkren ba katba nangmih ki sngi ki symbai kba tynrai kila nangduh jait naba ki briew kim rep shuh ïaki.

Ka kong Rica Lamare ka trei kum ka Assistant Development Officer hapoh ka Laskeiñ kala ong haka jingkren jong ka bad bunsien ki heh sorkar haka tnat treikam jong ka ki sheit phah ïaki ban wad biang ïa ki symbai tynrai kiba kibriew ki sheit pyndonkam, hynrei sngewsih ba kim ju ïoh satia kumba ki mut. Ila ong ruh ba ka pyrthei mynta ka kwah ban bam ïaka ja kaba shet naki symbai tynrai kiba kyrpang kumta ngi donkam ban kunai bha ïakine ki symbai tynrai.

Ka kong Hamsñiawpher Suchiang kaba long ka nongïalam jong ka kynhun kaba sdang ïaka jaka kynshew synbai tynrai (seed bank) haka shnong Mulum kala pynpaw ïaka jingngewkmen ba naduh ba kila sdang biang ban kynshew symbai kila lah ban lum shibun ki symbai tynrai kiba kynthup ruh ïa ki symbai khaw bakyrpang. U ma Thij Langstang uba long u nongrep bapawkhmat jong kane ka thaiñ ruh ula ong ba ki symbai kba kila nangduh jait katba nangïaid ki sngi wat haka rta jong u ruh, ula ñiew ruh ïa  ki symbai kiba ki ju rep mynba ki dang khynnah hynrei mynta kim don shuh.

Ka Pasqualina Lamare kaba long ka Program Coordinator jong ka SURE kala ong ba tang ha Jaiñtia hills ki ju don palat shispah jait ki symbai khaw, hynrei mynta kila nangduh jait kumjuh ruh u Pius Rani uba long u Senior Associate ka NESFAS ula ong bah aka por ba u don ha Phillipines u lap ba ki briew hangne ki don palat hynriew hajar jait ki jait kba bad ula ong ba kumba long ïa u kba, ka jia kumuh ïa u krai uba ki briew jong ngi ki rep bha, hynrei mynta ula nangduh jait.

Ki kynhun kiba la ïashim bynta ki dei ka Kyntulang SHG, ka Iakrehlang SHG, ka Lamlynti SHG, ka Pynroilang SHG, ka Seiñdur SHG bad ka kong Aiom Ksiar bad ka Kyntulang SHG kila wan rah ruh ïa ki jingbam kiba ki shna na ki soh ki pai. Ka Mukhap Handloom pat kala wan rah ban pyninam ïa ki jaiñ kiba ki thaiñ hi.

Ka thong ka long ban pynkhie im bad ban hikai ïaki nongrep ïaka jingdonkam ban bat symbai biang ïa ki synbai tynrai kiba la jan duh jait bad nalor ka jingpyni nam ïa ki symbai, ki nongrep ki ïa kylliang symbai pat paramaki (seed exchange program). Ïa ki symbai kba ban pyninam ha kane ka sngi la wan rah da ka Seiñ Raid Mukhap kala pyninam ruh ïa ki tiar rim bad wat kiba ki briew kim pyndonkam shuh mynta. Ka Seiñ Raid Mukhap kala air uh ïa kawei ka jingshad kolshor ha kane ka sngi.

Kawei pat ka bynta jong kane ka project ka dei kata kaba ki khot haka ktien phareng ka Agroecology Learning Circle ha kaba ki nongrep ki ïasam ïa ki jingshem jong ki hakarep ka riang jong ki. Ha kane ka sngi ka kong Darihun Langstang bad ka kong Phomly Langstang na Mukhap bad kumjuh ruh ka kong Phromly Kassar naka shnong Shkenpyrsit kila ïathuh ïa ki rukom sumar jingthung kiba leh da kaba pyndonkam ïa ka jingtip tynrai bad ka sap kaba ki don.

Ki don haduh hynñiew kynhun kiba ïashim bynta haka jingïakop phawer halor ka phang kaba ïadei bad ki jingbam tynrai kiba wan na ki shnong kiba pher bapher. Ka kyhun kaba jop ka dei na Mukhap, kaba ar pat ka dei kaba na Pynthor Langteiñ. Ha kane ka sngi ka SURE bad ka NESFAS la ïadonlang ruh kiwei pat ki Seng Treimon Sngewbha kum ka NSS, ka Faith Foundation bad ka NEN na Nagaland kiba la wan ïalam ruh ïa ki nongrep na ki thaiñ kum na Ribhoi distrik bad na East Khasi hills Distrik.

Ka dei ka sien kaba nyngkong ha ka history jong ka jylla ba kan don ka tamasa kaba kyrpang tang naka bynta u khaw. Kane ka Rong Khaw ka dei shibynta jong ka porjek ‘no one shall be left bhind’ kaba la bei pisa da ka NEC ïa kaba ka NESFAS, ka SURE, ka Social Service Centre (SSC) bad ka North East Network (NEN), Nagaland ki ïatreilang. Kiwei pat kiba la kren ha kane ka jingïalang ki dei u ma Ñiawbeit Ymbon  uba long u Waheh Chnong ka shnong Mukhap bad u ma Brightstar Langbang uba long u BDO ka Laskeiñ block ruh ula ïadon lang bad ïaka jingïalang la pynïaid da u H.H.Mohrmen.