Kurup ki BSF haduh 10 hajar kilo ka shini ba thmu khaii tuh sha Bangladesh

Syllad | The Rising MeghalayaMay 22, 2024

Ki shipai Border Security Force (BSF) na ka 110 Bn ha ka 20 tarik Jymmang ki la lah ban pynpulom noh ia ka jingthmu jong ki nongkhaii beain da kaba ioh ban kurup noh haduh 10,000 kilo ka shini ia kaba la thmu ban khaii tuh shapoh Bangladesh lyngba ki jaka khappud ka Bholaganj na East Khasi Hills.

Na ka liang ki shipai ki la ioh ruh ban kem noh ia arngut ki briew kiba donkti ha kane ka kam bad kurup noh ruh ia ka trok kaba ki la pyndonkam.

Hadien ba la ioh ia ka jingtip kaba bniah ki BSF ki la pynieng noh ia katei ka trok kaba kit shini bad ha ka jingtohkit, na ka liang u nongniah um shym la lah ban pyni ia ki kot ki sla kiba biang kaba la pynlong ia ki BSF ba kin bat noh ia ki.

Ia kane ka shini ba la ioh kurup kumjuh ia kine ki arngut ki briew la aiti noh sha ka ophis jong ka tnat Custom ka Bholaganj na ka bynta ban leh shuh shuh ia kaba donkam.