Kurup ki BSF ia ka trok bad bus ba kit shibun bah ki mar bam, shah kem san ngut

Syllad | The Rising MeghalayaSeptember 30, 2024

Ki shipai Border Security Force (BSF) ka Meghalaya ki la ioh ban kurup noh ia kawei ka trok bad kawei ka bus kiba kit ia shibun bah ki mar bam na ki bynta khappud ka East Khasi Hills ha kaba ki la kem noh ruh ia san ngut ki briew kiba dei ki nong India.

Ki BSF na ka 193 Battalion ha ka 29 tarik Nailur ki la lapdien ia kawei ka trok bad kawei ka bus ha ka lad Ranikor – Dangar kiba wan na Shillong da ka jingthmu ban leit sha ki jaka khappud ha ryngkat shibun bah ki mar bam kiba kot haduh kumba T.43 lak.

Ha ka jingtohkit, ki nongniah jong kine ki kali kim shym la lah satia ban pyni ia ki kot ki sla kiba iadei bad kine ki kali bad ki amr ba la pynkit bad ka jaka ba thmu ban pynpoi.

Hadien kane ki BSF ki la kem noh ia san ngut ki briew bad kurup noh ia kine ki kali ia kiba hadien la aiti noh shapoh Dangar Police Outpost ban leh shuh shuh ia kaba donkam.