Kurup ki BSF iaki masi ba thynnian jubor ha ki kali Alto na East Jaintia Hills

Syllad | The Rising MeghalayaAugust 3, 2023

Ki shipai na ka tnat 172 Bn Border Security Force (BSF) haka sngi Palei, ki la ioh ban pyllait noh ia ki artylli ki masi ia kiba la thynnian jubor ha ki artylli ki kali alto ia kiba la thmu ban khaii beaiñ shapoh Bangladesh na ki bynta khappud ka East Jaintia Hills.

Ia kine ki kali la lapdien da ki shipai BSF kiba ap pahara hapoh ka jingkieng Sonapur, East Jaintia Hills. Mar ia iohi ia kine ki kali ki BSF ki la pyni dak ban pynieng hynrei kila phet krad pynban sha ka thain Umkiang.

Hadien ka jingbeh thong ki BSF kila lapdien ia kine ki kali bad kurup noh ia kine ki masi kiba don hapdeng ka jinglot jingswai hynrei ki nongniah jong kine ki kali ki la ioh ban phet krad noh na kane ka jaka da kaba shim kabu ia ki jaka khlaw ba rben kiba don harud jong ka surok.

Ia kine ki masi bad ki kali ba la ioh kurup la aiti noh sha ki bor pulit ha Umkiang na ka bynta ban leh shuh shuh ia kaba donkam.