Kurup ki BSF shibun bah ki masi bad rynsun ba thmu khaii tuh sha Bangladesh

Syllad | The Rising MeghalayaNovember 14, 2024

Ki shipai Border Security Force (BSF) ka Meghalaya ha ka 13 tarik u Naiwieng ki la ioh ban bat noh ia ki artylli ki kali Bolero pickup kiba kit ia ki masi bad shibun bah u rynsun ba shongdor palat T.15 lak ia kiba la thmu ban khaii tuh shapoh Bangladesh na ki jaka khappud ka East Khasi Hills bad South Garo Hills District.

Hadien ba la ioh ia ka jingtip kaba thikna, ki BSF na ka 22 Battalion ki ba la pynlong ka jingpynap shrip ki la ioh ban bat noh ia ki artylli ki kali Bolero pickup najan ki bynta khappud jong ka ri ha South Garo Hills.

Kine ki kali ba la ioh kurup ki dei kiba don ia u number ML 08 K 3955 bad  No- AS 18AC 7177 kiba kit haduh 40 tylli ki masi.

Hadien ki shipai ki la kurup noh ia kine ki kali bad ia ki masi bad aiti noh shapoh ka police station na ka bynta ban leh shuh shuh ia kaba donkam.

Ha kawei pat ka jingkhynra, ki BSF na ka 110 Battalion ki la ioh ban kurup haduh 5,320 kilo u Rynsun na ki bynta khappud jong ka ri na East Khasi Hills.

Ia une u rynsun la buhrieh hapoh kawei ka jaka khlaw ha ki bynta khappud da ka jingthmu ban khaii tuh shapoh Bangladesh.Hadien kane la aiti noh ia sha ka ophis ka Tnad Custom ban leh ia kaba donkam.