Kurup ki pulit ia ka tiar siat, tiar pynbthei bad ka lama HNLC na ka jingkhynra ha Ri Bhoi

Syllad | The Rising MeghalayaMarch 13, 2024

Ki pulit ka Jylla ha ka 13 tarik mynta u bnai ki la ioh ban kurup noh ia kawei ka pistol, bun tylli ki tiar pynbthei kynthup ia ka lama jong ka Seng kieng atiar Hynniewtrep National Liberation Council (HNLC) bad bun kiwei pat tiar napoh ka iingsah jong uwei na ki dkhot barieh ne sleeper cell jong ka Seng na Ri Bhoi District.

U SP ka Ri Bhoi District, u Jagpal Singh Dhanao u la ong ba kane ka jingioh kurup ka la wan long ruh shi sngi hadien ba ki pulit ki la lapdien ia ka jingtreikam jong ka sleeper cell ka HNLC bad ioh ban kem noh ia uwei u suba donkti uba la phla bad ialam ia ki pulit na ka bynta ban pynlong ka jingkhynra hapoh ka iingsah.

“Lah ban kdew ba kane ka juh ka tnat barieh ka HNLC ka dei kaba donkti ha kaba pynher  ia ka lama jong ka seng lyngba ka hukum da ki nongialam kiba don shapoh Bangladesh ha kine ki snem kiba la dep,” u la ong.

Nalor kata u la ong ruh ba ki nongialam napoh Bangladesh ki la thong ia kine ki dkhot barieh da ka pisa kaba heh kynthup ia ki kali thymmai na ka bynta ban leh ia ki kam pyntriem lyngba ka jingpynbthei da ki bom IED. Ka jingtohkit mynta ka dang iaid shakhmat.

Kane ka la wan long ruh hadien ba ki pulit ki la lah ruh ban pynpulom noh ia ka jingthmu jong katei ka kynhun barieh ban pynbthei da ki bom IED ha ka nongbah Shillong bad ha sor Nongpoh.

Ki pulit ki la ioh ruh ban kem noh ia sawngut ki dkhot jong kane ka kynhun napoh Ri Bhoi ia kiba la tip kyrteng kum u Damanbha Ripnar ba ju khot u Shall Lapang, Robinis Ripnar, Jill Tariang bad u Shining Nongrum.

Na ka liang ki bor pulit ki la rejistar case pyrshah ia kine ki briew kiba la shah kem ha Nongpoh Police Station hapoh ka kyndon 120B/121A IPC bad ka kyndon 10/13/18 UA(P) Act nalor ka kyndon 5/6 Explosives substance act.