Kurup ki pulit ia ki tiar tuh na ka trok ha 4th Furlong; na Manipur kurup ia ka maruti

Syllad | The Rising MeghalayaSeptember 30, 2024

Ki pulit ka East Khasi Hills ha ka janmiet jong ka 29 tarik Nailur kila ioh ban kurup ia shibun bah ki tiar tuh ha kaba iadei bad ka case kaba la rejistar ha ki kyndon bapher bapher hapoh ka Rynjah Police Station.

U Superintendent of Police ka East Khasi Hills, u Bah Sylvester Nongtnger lyngba u kyrwoh u la ong ba ia kine ki tiar tuh la lapdien najan 4th Furlong kaba la pynlong ia ki bor pulit ka Nongmensong OP ba kin her bran bran sha katei ka jaka, bad ha ka jingtohkit ki la lapdien ia kawei ka trok hynriew shaka kaba don ia u Registration No. AS01CC-3985 kaba kit ia kine ki tiar ia kiba la ithuh kum ki tiar tuh kiba kynthup ia 10 unit ki Beam Web Assembly, 32 Unit ki Shuttering Jack, kawei ka mobile phone bad ka sim card.

Nalor kata u la ong ba ki pulit ki la ioh ruh ban kurup noh ia kawei ka kali Maruti kamai kaba don ia u number ML 05K 7554 ha kaba iadei bad katei ka jingjia.

U SP ula pyntip ba ha kawei pat ka bynta, la lap ksai ha kaba iadei bad kawei pat ka case jong ka Sadar Police Station, lyngba ka jingioh kurup ia kane ka kali na Imphal, Manipur.

Kane ka jingjia ka la wan long hadien ka jingujor ejahar pyrshah ia u Mohammad Fareed uba shong ba sah ha Barapathar, Mawbah, Shillong ha kaba la kynnoh ba u Fareed u la khroh bad pynbor ia u ban bahkhlieh ha kaba iadei bad ka jingthied ia ka kali Maruti Suzuki Eeco 5 STR khlem da pynpaw ba ia katei ka kali yn shim ha ka kyrteng jong utei u nongujor kaba la pynlong ia u ban hap ban siew ia ka jingshim ram.

Hadien ka jingpynlong ia ka jingtohkit kaba bniah, ia kane ka kali la lapdien bad pynkynriah pat sha ka Nongbah Shillong. Mynta ka jingtohkit halor kine ki artylli ki jingjia ka dang iaid shakhmat khnang ban lap ia ki jingshisha baroh, ong u heh pulit.