Kurup masi 235 tylli na East bad West Jaiñtia

Syllad | The Rising MeghalayaJanuary 22, 2020

JOWAI: Haduh 235 tylli ki masi la ïoh kurup ki shipai BSF na East bad West Jaiñtia Hills District.

Na West Jaiñtia Hills District, u Superintendent of Police Bah Lakador Syiem ula ïathuh ba naduh 6 tarik haduh 19 tarik une u bnai ki shipai BSF kila ïoh kurup 166 tylli ki masi, kata naduh ka 6, 7, 10, 11, 12, 13, 14, 16, 17, 18 bad 19 tarik une u bnai.

Baroh kine ki masi kiba la ïoh kurup ki dei kiba thmu ban shalan beaiñ sha Bangladesh. Ïa kine ki masi la kurup ha khappud India Bangladesh kaba hap ha Dawki Police Station.

U Bah Lakador ula kyntu ïaki trai masi ne kino kino kiba don jingtip halor ka jingshah tuh masi ban wan mih sha thanad ban ïoh leh ïa kaba donkam.

Na East Jaiñtia Hills la ioh kurup 69 tylli kata haka 18 tarik bad 20 tarik une u bnai. Halor kane u Deepak Kumar, Asst. Commandant, Coy Commander, G-Coy, 97 Bn, BSF, BOP Ratacherra East Jaintia Hills ula ujor ka ejahar haka 18 tarik une u bnai haka por kumba 2.45 am, ki shipai BSF kila ïohi 8 haduh 10 ngut ki briew kiba ym lah satia ban ithuh ki ïaid sharum shaneng ha u pud u sam ka Ri India bad Bangladesh.

Ki briew kila lait phet bad haba wad ïaki la lap pynbna ïaki masi haduh 51 tylli.

Ha ka 20 tarik pat, u SI S.N Biswas, MCP Commander, Sonapur East Jaintia Hills ula ujor ka ejahar ba haka 20 tarik une u bnai haka por kumba 6.20 am katba ki dang khynra kali ha jingkieng Sunapur, kawei ka trok kaba don u number AS-02-2289 kala pynher sted na katei ka jaka ba khynra kali. Kumta ki shipai kila beh nadien ïa kane ka trok bad lap ba la shu ieh noh ïa kane ka trok harud surok.

Haba khynra iaka trok la lap 18 tylli ki masi ba kit ha katei ka trok, katba u nongniah ka kali ruh ula ieh ï aka kali ha surok.