Kut jingmut ka HNLC ban bteng kieng atiar haduh ba ka sorkar kan sngap ia ki jingeh ki paid Hynniewtrep

Syllad | The Rising MeghalayaAugust 15, 2024

Ka Hynniewtrep National Liberation Council (HNLC) ha ka 14 tarik Nailar ka la pynpaw halor ka jingkut jingmut ba kan bteng ia ka jingialeh da kaba kieng atiar tad haduh ba ka Sorkar kan pynsngap ia ki jingeh jong ki jaidbynriew Hynniewtrep.

Ha u kyrwoh ba la pyllait ha ka jingrakhe ia ka lyngkhuh snem kaba 37 jong ka Seng HNLC, u General Secretary Cum Publicity Secretary ka Seng u Bah Sainkupar Nongtraw u la ong, “Ha ka lyngkhuh snem kaba 37 jong ngi, Nga pynpaw ka jingsngewnguh ia baroh ki dkhot ka HNLC, ia kiba haiing hasem jong baroh ki dkhot jong ngi, ki nongkyrshan, ki Sengtrei mon sngewbha, ki lad pathai khubor bad ki paidbah nongshong shnong. Ka jinglen lade ki dkhot jong ngi ha ka jingialeh pyrshah ia ka rukom synshar phareng kan ym long lehnoei, bad ngi kut jingmut ban bteng ia ka jingialeh jong ngi da kaba kieng atiar haduh ba ka Sorkar kan pynsngap ia ki jingeh jong ngi.Ngi ngeit ba ngi long ka jingkyrmen kaba khatduh na ka bynta ki paid Hynniewtrep bad ba ka HNLC ka dei ka lad kaba khatduh na ka bynta ka Sorkar India ba kan shimkhia ia ki jingeh jong ngi.”

“Ha kane ka sngi, Nga shu kwah ban pynpaw sha phi ba une u bnai u long uba kyrpang u ban pynkynmaw ia ki jingjia ha ka histori jong ka jaidbynriew. Ka 13 tarik Nailar ka dei ka sngi iap jong u Bah Che, ka 14 tarik ka sngi ba la seng nongrim ia ka HNLC, bad ka 15 tarik ka sngikha jong u riew khraw jong ngi u Syiem Wickliffe,” u la ong haba aijingmut ia ki hymmen ki para ka u Hynniewtrep bad ki sengbhalang ban pynbna ia une u bnai kum ka “Hynñiewtrep History Month” lane “Hynñiewtrep History Week”.”

U Bah Sainkupar u la ong ruh, “Lyngba kane ka sienjam, ka imlang sahlang ka jong ngi ka lah ban pynkhreh bad pynlong ia ki prokram bapher bapher kum ka jingpyni ia ka kolshor, ia ka histori bad ki jingai jinghikai.Kine ki prokram kin thmu ban pyni bad burom ia ki jingnoh synniang bad ki jinglen lade jong ki riewshlur bad ki nongialeh laitluid jong ngi ha ka histori jong ka jaidbynriew.”

“Lada ka jaidbynriew kam don ia ka histori, kata ka mut ba kam don ia ka rekod.Lada ym don ia ka rekod kata ka mut ba kam don ei ei. Kumba ngi tip, ka bynta ba kongsan jong u dieng ka dei u symbai, ym u tynrai ne ki tnat jong u.Kumjuh ruh ka bynta kaba kongsan tam jong kano kano ka ri ka dei ka histori,” u la bynrap.

“Haba pynkut, Nga kwah ban ong ba ka Sorkar India kam shym la pynjot ia ngi ba ngi dei ki Hynniewtrep, lane ba ngi dei ki Khristan Lane Niam Tynrai; hynrei ngi la shah pynjot namar ba ngi duna ia ki jingtip ia lade,” ong shuh shuh utei u nongialam ka HNLC.