Kut jingmut ka Meghalaya ban long ka Jylla kaba khuid tam ha ka Ri ha ka jingpyllait iaka Swachhata Hi Seva Campaign

Syllad | The Rising MeghalayaSeptember 18, 2024

Ban pynkhlain ia ka kam treimon sngewbha bad ka jingiatreilang na ka bynta ban wanrah ia ka khuid ka suba bad ban rakhe ia ka jingdap 10 snem jong ka Swachh Bharat Mission, ka Swachh Bharat Mission Gramin (SBM-G), Public Health Engineering Department (PHE) & Swachh Bharat Mission Urban (SBM-U), Urban Affairs Department ha ka 17 tarik Nailur ka la pyllait paidbah ia ka ‘Swachhata Hi Seva’ (SHS) 2024 ha nongbah Shillong.

U Symbud Myntri Rangbah ka Jylla u Bah Sniawbhalang Dhar uba khmih ruh ia ka Tnad Urban Affairs haba ai jingkren ha kane ka sngi u la ban jur halor ka jingdonkam ban pynneh ia ka jingkhuid jong ka mariang bad ka jingshim jingkitkhlieh jong uwei pa uwei pa kawei na ki nongshong shnong ban him ia la ka jong ka bynta ban pynneh ia ka khuid ka suba.

U la ong ruh ba kane ka Mission ba la pyllait da u Myntri Rangbahduh ka ri u Narendra Modi ha u 2014 ka dei ka prokram kaba kongsan kaba donkam ia ka jingiashim bynta jong ki paidbah ban ioh ia ka jingjop.

U Myntri ula pynpaw ba ka tnad Urban ka la dep ban bhah bun ia ka mang pisa na ka bynta ban tei ia ki jingtei kynthup iaka T.5.8 klur ban shna pynbha ia ka lynti iaid kjat ha Iewduh bad kala tyrwa T.15 Klur na ka bynta ban pynbha ia ki iew tynrai. Ka jingpynthymmai ia kane ka iew kan kynthup ban phiah ia ki basa die jhur, jaka die doh bad ki jaka die jain kumjuh.

Nalor kata u la pynpaw ruh halor ka jingiohi jngai jong ka sorkar ban pynlong ia ka Meghalaya kum kawei na ki jaka jngohkai pyrthei ba pawnam jong ka India hapoh jong ka 5 snem ban wan bad ula ban jur ba kane kan urlong da ka jingdon ia ka jingkhuid jingsuba.

Yn rakhe ia kane ka Swachhata Hi Seva naduh ka 17 tarik Nailur haduh ka 2 tarik Risaw halor ka phang pdeng ‘Swabhav Swachhata – Sanskaar Swachhata.’

Na ka liang ka Deputy Commissioner ka East Khasi Hills ka Kong R M Kurbah ha ka jingkren kala pynpaw ba kum ki nongshong shnong ka dei ka kamram ka jong ki ban kut jngmut ban shim ia ka jingkitkhlieh ban pynthikna ha kaba iadei bad ka jingpynneh pynsah ia ka khuid ka suba bad ban leh ia kei kaei kaba ngi lah ban leh na ka bynta ka ri.  Nalor kata ka pyntip ruh ba na ka liang ka sorkar ka la mang haduh 70 tylli ki kali e-vehicles ha kaba 67 tylli la ioh ban pdiang bad la pyntreikam ruh ia ki ha kaba iadei bad ka jingkit ia ki niut ki nier na ki tyngkong iingbriew.

Shuh shuh ha kane ka sngi kum ka dak ka jingpyllait ia ka Swachhta Hi Seva (SHS) 2024, la shim jingkular Swachhata.

Kumjuh na ka liang u Bah JP Lakiang, MCS, Joint Secretary bad Mission Director, Swacch Bharat Mission Grameen u la pynpaw ba ka jingdon lang jong baroh ha kane ka prokram ka pynpaw ia ka jingshimkhia lang ban pynroi ia ka kolshor jong ka jingkhuid jingsuba kaba long ka nongrim jong ka imlang sahlang kaba koit ba khiah bad kaba kiew shaphrang. “Ka Swachh Bharat Mission ka la long barabor ym tang ka jingpynkhuid hynrei ka jingiakhih ha kaba pynkylla ia ka rukom im jong ngi bad ban pynrung ia ki jinglong kiba kyntiew ia ki shnong ki thaw.