Kut jingmut ka Sorkar ban pynkylla ia ka Meghalaya sha ka Jylla ka ban kynjoh 10 billion USD ha ka ioh ka kot

Syllad | The Rising MeghalayaMarch 1, 2025

U Lat ka Jylla u CH Vijayashankar ha ka 28 tarik Rymphang u la ong ba ka sorkar Jylla ka la kut jingmut ban pynkylla ia ka Meghalaya sha ka jylla ka ban kynjoh sha ka 10 billion dollar haka ioh ka kot kat haduh u snem 2028.

Ha ka jingkren lamphang ha ka sngi kaba nyngkong jong ka Dorbar Mang Tyngka ha kane ka sngi, u Lat u la ong, “Katba ngi dang bteng ia ka jingangnud ha ka jingiaid lynti ka jong ngi ban pynkylla ia ka Meghalaya sha ka jylla ka ban kynjoh sha ka 10 billion dollar ha ka ioh ka kot kat haduh u snem 2028, ngi ithuh ia kane ka khyllipmat kum ka lad ban pynskhem ia ka jingkut jingmut ka jong ngi na ka bynta ka roi ka par jong kane ka jylla kaba khraw jong ngi. Mynta ka sngi ngi ban ia ka kamram jong ngi ban iatreilang na ka bynta ka lawei kaba phyrnai jong ki paidbah ka Meghalaya. To ngin iatylli ha ka thong ka jong ngi sha ka roi ka par ka ban pyniaid da ka jingthmu lang jong ngi na ka bynta ka Meghalaya kaba kit shaphrang.”

U la ong ba ka sorkar ka don ia ka jingangnud ia ka Meghalaya kaba pynbiang ia ki jingdonkam bad ki jingangnud ba kyrpang jong ki nongshong shnong da kaba bynrap ban pynurlong ia kane, ka jylla ka la wanrah ia ka rukom pynroi kaba pynpaw ia ka mynsiem ki nong Meghalaya – kawei ka jingiatreilang, ka jingshlur ban shim ia ki sienjam bad ban wanrah ia ki buit treikam kiba thymmai. Ka sorkar ka dang pynkhreh ia ki sienjam kaba pyniasoh ia ki jingstad tynrai bad ki buit treikam jong ka juk ba mynta khnang ba kin long kiba kham seisoh shuh shuh.

U Lat u la ong ruh ba ka sorkar ka la aiti lut na ka bynta ka roi ka par kaba pura ha ka jylla Meghalaya, ban pyni ia ka jingriewspah ha ka kolshor bad ban kyntiew ha ki jingai jingshakri na ka bynta ki nongshong shnong.

“Ngi la kiew shibun ha u snem ba la dep, da kaba wanrah ia ki buit kiba thymmai, kum ka CM Connect bad ka Hello Meghalaya. Kine ki sienjam ki la kyntiew ia ka technology kaba iarap ban buh ia ka kolshor jong ka Meghalaya hakhmat eh bad ban pynthikna ia ka jingsynshar kaba treikam na ka bynta ki nongshong shnong ki jong ngi.”

U la ong ba ka jingpynjanai ha ki rukom treikam kum ha ka jingpyntrei ia ki surok, bording, jingpynpoi um, ka jingkyntiew ia ki jingseng kam, IT&C, kam jngohkai pyrthei bad ha ka rep ka riang kan kyntiew ia ka ioh ka kot ha ka jylla bad ki jingshim khia ha ka liang ka koit ka khiah, ka pule puthi, ka jingplielad ha ki kam kamai kajih, ka jingshngain ha ka imlang sahlang bad ka jngsynshar kaba pynshong nongrim ha ki nongshong shnong kan pynthikna ia ka bha ka miat jong uwei pa uwei u nongshong shnong.

Haba kren halor ki polisi bad ki prokram jong ka sorkar MDA u Lat u la ong ba ka jylla mynta ka dang pyntreikam ia kiba bun bah ki project kiba ioh jingiarap na shabar, ha ki bynta jong ki surok, ka bording, ka rep ka riang, ka jingpynneh pynsah ia ki um ki wah bad ki kam jngohkai pyrthei.Ia kine ki project la bei tyngka da ki tnad bapher bapher kum ka World Bank, International Fund for Agricultural Development, ka New Development Bank, ka Japan Internationa Cooperation Agency bad ka Asian Development Bank. 72 percent na ka jingbei tyngka hapoh jong kine ki project ka dei kaba la aijingiarap da ka Sorkar India katba ia kaba sah la noh synniang da ka sorkar jylla.

U la ong ruh ba ka sorkar ka pyndonkam ia ka jingkyrshan pisa na ka Ministry of Development of North-Eastern Region lyngba ki skhim bapher bapher. Hapoh ka prokram PM DeVINE program, sawtylli ki project la mang tyngka mynta u snem ha ka jinglut ka ba kot sha ka T.395 klur.Kine ki kynthup na ka bynta ka jingshna ia ki surok ha New Shillong, jingshna ia ka  IT Park ha Tura, ka jingshna ia ka Skywalk, ka Tourist Hub ha Dympep abd ka jinshna ia ka Passenger Ropeway ha Lum Shillong.

Da kaba kam ba ka skhim sengkam seng jam jong ka jylla, ka CM ELEVATE ka dei ka jingjop kaba khraw, u Lat Vijayashankar u la ong, “Hapoh kane ka prokram, la ai subsidy 37-75% ban seng ia ki kam ki jam bapher bapher ha ka rep ka riang, ri jingri, kam jngohkai, ki kam ialehkai, ka koit ka khiah bad ka leit ka wan.Kane ka skhim ka la aijingmyntoi ia palat 2800 ngut ki briew lyngba ki 12 tylli ki skhim kyrpang kiba kham rit.”

Haba banjur halor ka jingkongsan jong ki surok, u Lat u la ong shibun tylli ki project surok kiba kongsan la mang mynta u snem ban kyntiew ia ki lad pyniasoh sha ki jaka kiba don sha ki thain kiba kyndong tam.

U la ong ruh ba ka jingpyntrei ia ka surok Shillong-Dawki Highway bad ka surok Tura-Dalu ki iaid shakhmat da ka jingmynjur ba la ai na ka bynta ban shna lynti iaid thymmai ia ka surok Pynursla bypass. Nalor kata ki project ba kongsan kum ka Shillong Western bypass ruh ka la iaid shakhmat.

“Ka Tnad Pla Tyngka ka Sorkar India ka la mang ruh ia ka song pisa kaba haduh T.2,460 klur na ka bynta ban pynbha ia ka jingpyniasoh lyngba ki surok bad ban tei ia ki jaka pynroi ha ka jylla hapoh ka project Meghalaya Economic Growth Corridor (MEGA),” u la ong.

U Lat u la pyntip ruh ba ka jingpynkylla ia ki jingkieng SPT sha ki jingkieng nar ruh ka dei ka bynta kaba la buh hakhmat eh.Tang mynta u snem la mynjur haduh 484 mitar ki jingkieng RCC. Hapoh ka PMGSY 3,, ka jylla ka la ioh ia ka mang tyngka na ka bynta ki 88 tylli ki project surok bathymmai kiba kynthup ia 782 km bad 55 tylli ki jingkieng kiba kot sha kumba T. 1056 klur.

Ha kaba iadei bad ki kam pynroi sor, u Lat u la ong ba ka New Shillong City ka dei kaba hakhmat eh ha ka jingpynroi sor kaba thymmai kaba kynthup langia baroh ha kaba la buh ia u mawnongrim ha ka sngi rakhe ia ka Meghalaya Day mynta u snem.Kiwei pat ki project ba kongsan kum ka Shill Hub, Unity Hall bad ka Shillong Water Supply Scheme la pyntrei shaid shaid. Hapoh jong ka smart cities mission la lah ban pyndep bad plie ia ka integrated command bad control centre ha ka nongbah Shillong.