Kut jingmut ka Sorkar ban wad ki lad ban pynkut iaka kam iakhajia pud : Conrad

Syllad | The Rising MeghalayaMarch 5, 2025

U Myntri Rangbah ka Jylla u Conrad K Sangma ha ka 4 tarik Lber u la kular ba ka sorkar jong u kan shim ia ki lad ki lynti ban pynbeit noh ia ka kam iakajia pud ha ki jaka kiba dang sahteng bad bad ka Assam khnang ban pynthikna ia ka jingsuk kaba neh junom.

“Ngin wad ia ki lad ki lynti ban weng ia ki jingeh bad pynthikna ia ka jingsuk kaba neh junom. Mynta, ngi la ia soi ia ka Memorandum of Understanding (MoU) bad pynbeit ia ki hynriew tylli ki jaka kiba don hapdeng ka jingiakajia,” ong u Conrad haba jubab ia ka motion ba la wanrah da u MLA ka UDP na Nongpoh u Bah Mayralborn Syiem hapoh ka iingdorbar.

Haba pynpaw ba kane ka mat ka dei kaba jyrwit jyrwat bha, u CM u la ong ba kiba bun ki sorkar ha ki snem kiba la leit kim ju kwah ban iakren halor ki kam khappud, hynrei dei tang kane ka sorkar Meghalaya Democratic Alliance (MDA) kaba la shim ia ki sienjam ba shlur ban ong, “To ngin iakren bad wad ia ki lad ki lynti ban pyniaid shakhmat.”

U pyntip ruh ba ka sorkar ka la dep ban ia pynbeit ia ka Tarabari sector (kawei na ki hynriew tylli ki jaka ba iakajia) haba pynshong nongrim halor ka mon jong ki paidbah. Na ka liang ka sorkar Assam ka la randien noh hadien ba ki shnong jong kane ka thain ki la wansha Meghalaya.

“Dei na kata ka daw ym don nonghikai satia ha ki skul ha kum kine ki shnong. Ngi la shim ia katto katne ki sienjam bad ngin sa shim shuh shuh ban leh ei ei halor kane ka phang,” ong u CM.

U Conrad u la kular ruh ba ka sorkar kan shim ia ki sienjam ban pynthikna ha kaba iadei bad ki jingtei kiba donkam kaba kynthup halor ka jingpyniasoh lyngba ki surok bad kiwei kiwei ki jingai jingshakri sha ki briew kiba shong ba sah ha kine ki jaka ba ladep ban ia pynbeit pud.

Halor ka jingkynnoh pyndonkam bor jong ka Assam, u CM u la ong  ba kane ka dei ka jinglong jingman kaba shem jingeh shibun. “Naduh kine ki 53 tylli ki snem kiba la leit noh kiba kum kine ki jingjia ki la bteng ban jia na ka por sha ka por. Haba pynpaw halor kane, kaei kaba kongsan ban shimkhia ka long halor ka lynti kaba ngi hap ban jan shakhmat ia kaba ngim pat ju iohi ha ki snem kiba la leit noh.”

“Kine ki dei ki jingeh kiba shem shitom shibun, hynrei ka dei tang lyngba ka lynti jong ka jingiakren kaba lah ban pynbeit,” u la ong haba pynpaw ka jingsngewkhia halor ki jingjia ba sngewsih kiba la jia ha ki jaka khappud.

Nalor kata u la kyntu ruh ia ki dkhot ba kim dei ban sngew artatien ban pyntip sha u lada mih kino kino ki jingjia ha ki jaka khappud bad ong, “Phi lah ban iakren beit beit bad nga. Lada mih kano kano ka jingjia ha ka constituency jong phi, ngan dei uba nyngkong eh u ban pynthikna bad ngin lah ban aijingiada ia la ki jong ki briew ha ki jaka khappud.”