Kut jingmut ki MLA ban ai ka jingkyrshan kaba pura ban iarap ki nongpang HIV ha ka jylla

Syllad | The Rising MeghalayaNovember 25, 2023

Na ka liang ki MLA ka jylla haka sngi Thohdieng ki la kut jingmut ban ai ka jingkyrshan kaba pura na ka bynta kito ki briew kiba la shah ktah ha ka jingpang HIV ne People Living with HIV (PLHIV) lyngba ki skhim jong ki bad ruh ban nang pynkhlain ia ki jingialap paidbah pyrshah ia kane ka jingpang ha ka jylla.

Kane ka jingshim rai ka la long haka jingialang ka governing body ka Meghalaya Legislator’s Forum on HIV/AIDS kaba la pynlong haka sien nyngkong ba la khot pynlong da u Lamphang ka iingdorbar thaw ain ka jylla u Thomas A Sangma ha Conference Room hapoh Pinewood Hotel, Shillong.

Ha kane ka jingialang la ia don lang ruh U Myntri Rangbah ka Jylla Conrad K Sangma uba dei u Chief Patron ka Meghalaya Legislator Forum on HIV/AID, u Symbud Lamphang Timothi D Shira, ka Myntri ka Koit ka Khiah Dr Ampareen Lyngdoh, Nongialam ka Liang Pyrshah Ronnie V Lyngdoh bad ki nongmihkhmat (MLA).

Ha kane ka jingialang la iakren halor ki hynriew tylli ki mat kiba iadei bad ki briew ba im ha ryngkat u khniang jingpang HIV ne (PLHIV), ka jingpynioh ka jong ki ia ki lad jingsumar, ka jingkyrshan lyngba ki prokram, ki lad ban pyniohkam bad kyntiew ia ka sap treikam ba ki don, ban ai jinghikai bad ialap paidbah, ka jingkyrshan da ki jingbam tei met bad ki lad jingiarap ha ki kam kiba iadei bad ki kyndon aiñ.

U Lamphang haba kren sha ki lad pathai khubor u la pynpaw ba ka kynhun ki nongmihkhmat halor ka jingiakhun pyrshah ia ka jingpang HIV/AIDS kin iashim bynta ban iakhun pyrshah ia kane ka jingpang lyngba ka jingpynlong ia ki prokram pynshai paidbah. U la ong ruh ba ka jingialang ka la iakren ruh ym tang ha kaba iadei bad ki PLHIV, hynrei ruh halor ki jingeh ha ka imlang ka sahlang, halor ka ioh ka kot, ki mat kiba ktah mationg bad kiwei pat ia kiba ki nongmihkhmat ki lah ban iarap ia ki briew khnang ba kin lah ban iadon bynta lang hapoh ka imlang ka sahlang.

Nalor kata u Lamphang u pyntip ruh ba ki nongthaw ain ka jylla ki la mynjur ban noh synniang na ki skhim ki jong ki lane ki discretionary grants na ka bynta ban iarap ia ki PLHIV. Nalor kata ka jingialang ka la shim ruh ia ka rai ba baroh ki 60 ngut ki dkhot ka Meghalaya Legislative Assembly ki dei ban iashim bynta shitrhem hapoh kane ka kynhun, namar ka jingkyrshan ka jong ki kan long ka jingiarap kaba khraw ha ka jingiakhun pyrshah ia kine ki jingpang.

Shuh shuh na ka liang u Lamphang ula pyntip ruh ba ka jingdon jong ki nongpang HIV ha Meghalaya ka la kham heh shuh shuh haba ia nujor bad ka National Average. Ula pyntip ruh ba u Myntri Rangbah ka Jylla Conrad K Sangma ula pynbna ba ka Sorkar mynta kala pynkhreh da ka Mission ban pynduna ia ka jingsaphriang jong ka jingpang HIV hapoh ka Jylla.

Kumjuh na ka liang u nongialam liang pyrshah u Bah Ronnie V Lyngdoh u la pynpaw ba lyngba kane ka kynhun ne Forum jong ki nongmihkhmat halor ka jingiakhun pyrshah ia ka HIV/AIDS, ki nongmihkhmat kin lah ban shim ia ki sienjam na ka bynta ban pynlong ia ki prokram pynshai paidbah ha kaba iadei bad kane ka bynta da ka jingiashim bynta lang ruh da ki kynhun bapher bapher hapoh ka imlang ka sahlang.