Kut ka taiew Bamphalar haka shnong Jowai

Syllad | The Rising MeghalayaJune 22, 2019

JOWAI: Ka Bamphlar ka dei kawei na ki rukom, dustur lehkmen leh sngewbha ba shisien shisnem jong ki dong ha shnong Jwai kiba kynthup ia ka Panaliar, Dulong, Loompyrdi-Iongpiah, Loomiongkjam, Tpep-pale, Chilliangraij bad ka Loomkyrwiang badha kine ki khyndiat snem ka kyntoit Umchayiar ruh ka shimkhia ban pyndep ia kane ka rukom dustur.

Ha une u snem ka Loomkyrwiang ka dei kawei na ki dong ba shim ban pyndep khatduh ia kane ka tamasa lehkmen da kaba pynlong ia ka jingialehkai drama ha ka 21 tarik u Jylliew katba ha ka 22 tarik pat ladon ka jingiabam khawai sngewbha ha yung walieh kaba long shibynta ban wanrah ia ka mynsiem iatylli, ia ieit hapdeng para khun ka dong ka shnat.

Ia kane ka Bamphalar lawan ban plie pyrda da u A.Andrew Shullai, MDC, JHADC kum u kongsan ryngkat ka jingiadonlang u Hamewan Laloo, Waheh Shnong, U Lammat-O Laloo, General Secretary, u Echwa Laloo, Secretary Bamphalara bad kiwei ki riew rangbah ka dong.

Na ka liang u A.Andrew Shullai haba ai jingkren shwa ban plie u la iaroh ia ka jingstad ki longshwa ban saindur ia kane ka rukom, dustur bad da kyntu ruh ia ki khun samla ka dong ba kin shimkhia ban pynjanai shuh shuh ia kane ka spah jong ka jinglong kyrpang ka jaitbynriew.

Khyndiat shaphang ka Bamphalar ha ki por mynshwa kat kum ka jingiathuh khanna ki riew rangbah la ong, ba ka jingialehkai drama ha yungwalieh ka long shi rukom ha kaba ki khun kynthei kim treh ban mih iashimbynta bad lada don ka bynta ban ak da ka kynthei, ki shynrang kin hap shim hi ia ka bynta jong ka kynthei ruh la ka long ha ka dur jong ka samla ne ka longkmie.

Da ka jingkylla jong ki por ha kawei na ki snem jong ka Bamphalar ki riew rangbah ka Loomkyrwiang da ka jingiohijngai ki la shim ban pynshlur ruh ia ki khun khynthei ka dong ba kin mih iashimbynta ha ka jingialehkai drama bad naduh kata ka por ka jingialehkai drama haman ki dong ka shnong Jwai ka la kylla da ka jingiashimbyntalang ki khun kynthai kum ki Puron bad ha lyndet kine ki jingkylla lah ban ong ba ka dong Loomkyrwiang ka dei ka nuksa ia kiwei ki dong ki shnat kaba lashim ia ka sienjam ban sei ne pynmih ia ki khun kynthei ha ka rynsan jong ka jingialehkai drama ha ki por Bamphlar.