Kut noh ka 17th State Aquatic Championship 2024 ka MSA ha pung Crinoline
Ka jingiakop jngi kaba ar sngi kynthih ba la tip kum ka ’17th State Aquatic Championship 2024,’ ba la khot pynlong da ka Meghalaya Swimming Association (MSA) ha ryngkat ka jingkyrshan da ka tnad Directorate of Sports & Youth Affairs ka sorkar Jylla ba la pynlong hapoh ka pung Crinoline Swimming Pool, Shillong ka la kut noh ha ka 20 tarik Naitung hapdeng ka jingshongkun lyngba ka jingwan iashim bynta shitrhem naduh ki khynnah kiba dang rit haduh kiba la san.
Ha kane ka kynti kaba mynta ka nongbah Shillong ka la lah ba kan sei bun eh ki nongwan iashim bynta kata haduh 86 ngut, bud sa ka Shella 23 ngut, Mawkyrwat 23, Garo Hills 8, East Jaintia 1 bad kiwei kiwei 2. Haba khein kyllum ki nongwan iashim bynta baroh ki long haduh 143 ngut, kata 98 ngut ki shynrang bad 45 ngut ki kynthei.
![](https://www.syllad.com/wp-content/uploads/2024/09/JIT-Vacancy-823x1024.avif)
Hadien kane ka jingiakop ba la phiah ha ki kyrdan bapher bapher na ka MSA ka la ioh ruh ban sam ia ki khusnam sha ki rang bad thei ialehkai ba kynsai ne best swimmer, kaba mynta ka kynti ha ka Sub junior 10-12 snem, kane ka nam ka leit sha u Keenan Momin hadien ba u la ioh ban khur 4 tylli ki takma ksiar bad 1 ka takma rupa bad na ka liang ki kynthei kane ka nam ka leit sha Anisha Phanbuh hadien ba ka la ioh ban khur 2 tylli ki takma ksiar.
Ha ka Junior 12 – 14 snem pat u Meiaipynsan L. Tron u la ioh ban rah ia ka nam nongjngi ba kynsai hadien ba u la ioh ban khur 5 tylli ki takma ksiar bad 2 tylli ki takma rupa, bad na ka liang ki kynthei kane ka nam ka leit sha Tvisha hadien ba ka la ioh ban khur 3 tylli ki takma ksiar.
![](https://www.syllad.com/wp-content/uploads/2024/07/State-Acquatic-Championship-1-jpg.avif)
Ha ka Junior 15 – 17 snem u Cleric Jayden Wanniang u la ioh ban khur 4 tylli ki takma ksiar kaba la biang pura ia u ban rah ia ka nam nongjngi ba kynsai na kane ka thup bad na ka liang ki kynthei kane ka nam ka leit sha Ilarisuk Youroi hadien bai la ioh ban khur haduh 5 tylli ki takma ksiar.
Katba ha ka kyrdan iakhun jong ki Senior u Banpynshngain Syngwan u la rah ia kane ka nam hadien ba u la ioh ban khur 4 tylli ki takma ksiar bad kawei ka takma rnong bad na ka liang ki kynthei I Alyssa M. Lyngdoh ila ioh ban khur haduh 3 tylli ki takma ksiar bad mar iwei takma rupa bad rnong ban rah ia ka nam nongjngi ba kynsai.
Lyngba kane ka lympung iakop jngi ba arsngi ba ka MSA mynta kan ioh ban jied ia la ki nongialehkai ban leit mihkhmat ia ka jylla sha ki National Swimming Competition ki ban long ha Odisha bad Mangalore ha u bnai Nailar u ban wan.
Leave a Reply