Kut noh ka Annual Sports Meet ka Wellington Jungai Memorial Secondary School

Syllad | The Rising MeghalayaMarch 24, 2019

JOWAI: Ka Annual Sports Meet jong ka skul Wellington Jungai Memorial Secondary School Ratacherra, East Jaiñtia Hills District kala poi sha kaba kut haka 22 tarik une u bnai.

Ha kane ka sports meet kaba la sdang haka 18 tarik  la pynlong shibun jait ki jingialehkai ba kynthup ïaka mareh thong, ka jingiakhun kti, quiz bad kiwei kiwei.

Hashuwa ban pynkut iaki jingialehkai la pynlong ïaka jingïalang kaba lyngkot pyniaid da u Ma T. Khonglah nonghikai jong katei ka skul haka jingiadonlang ki arngut ki riew rangbah ka shnong ba kynthup ia u Waheh Shnong u Ma Khamsngurbha Pohiing bad u Ma Bines Nijiar nalor ki khynnah skul bad nonghikai ka skul.

U Waheh Shnong u Ma Khamsngurbha Pohiing bad u Ma Bines Najiar haka jingkren ki la ai jingiaroh iaka jingtrei shitom jong ki nonghikai kiba la lah ban pynlong iaka jingialehkai kaba shongshit bad kaba jop.

Ki la ong ruh wat la kane ka skul ka don jngai na ka jaka sor, hynrei katba nang iaid ka por kane ka skul kala iaid shaphrang ha kaban sam ïak jingnang jingstad sha ki khynnah ka shnong bad ki shnong ba marjan.

“Ki khynnah skul ki donkam ban don ia kata ka mynsiem ialeh ban poi sha ka thong jong ka jingjop haka jingim, nalor ka pule ka puthi, phi (khynnah skul)  dei ban pynmlien ban ialehkai namar ba ka iarap ban pynproh iaka jabieng bad pynioh iaka met kaba koit kaba khiah. Ka kam sports ha kine ki sngi kadei kawei na ki kharkhana kaba lah ban ai kam aijam, kumta pyndonkam hok iaka sap kaba U Blei ula ai ha phi”, la ong u Khamsngurbha Pohiing.

Hadien ka jingialang la sam ïaki khusnam sha ki nongjop bapher bapher.