Kut noh ka Asmita City League ha Jowai, ka rynsan ban pynshlur iaki ‘thei ialehkai

Syllad | The Rising MeghalayaMarch 16, 2025

Ka ophis u District Sports Officer, West Jaintia Hills haka 15 tarik Lber kala pynlong iaka lympung ialehkai Asmita City League na ka bynta ka ialehkai athletic bad badminton ha Kiang Nangbah Stadium.

Ka Asmita (Achieving Sports Milestone by Inspiring Women Through Action) kaba tip mynshuwa kum ka Khelo India Women’s League, ka thmu ban thaw iaki lad bad kyntiew iaka jingialehkai hapdeng ki kynthei la ka long ka jingnang jingstad haka kam siat khnam, athlete, ka jingïalehkai ia kura lane ka jingpyni ïa ka jingtbit ha ka jingïalehkai badminton, basketball, footaball, bad tennis.

Haka jingiakop mareh Under-20, la sakhi iaka jingïashim bynta shit rhem jong ki kynthei haki kyrdan bapher bapher, naduh ka kyrdan 100m, 200m, 800m, 1500m, kumjuh ka Shot Put bad Long Jump.

Haka jingiakop Badminton Under-19 ki jingialehkai ki kynthup ka Single, Open Category bad Double Category.

Ki nongjop haka 100m ki long ka Wankynsai Pyrtuh, ba ar Eligency Susngi bad ba lai Navarre Laloo. Ha ka 200m ka Hakini Shullet kala wan ba nyngkong, bud ka Felicyjune Suiam bad ba lai ka Eligency Susngi.

Ha ka 800m ka Deisaphi Shadap kala wan haka kyrdan kaba nyngkong, ka Larihun Suiam kala wan ba ar katba Stacyroy Sutnga kala wan ba lai. Haka 1500m la ioh nyngkong da ka Deisaphi Shadap, ba ar ka Larihun Suiam bad ba lai ka Dalawanhi Suchiang.

Ha ka Shot Put la wan nyngkong ka Ewanmisa Suting, ba ar ka Wankynsai Pyrtuh bad ba lai ka Rikduplang Talang. Haka Long Jump la wan ba nyngkong ka Graceful Panoh, ba ar ka Daphishisha Dkhar bad ba lai ka Riyoka Talang.

Haka jingialehkai Badminton Singles, ka Nihaka Lamare kala wan ba nyngkong da kaba pynrem iaka Dabiangsakani Lyngdoh.

Haka Girls Under-19 Double ka Aureliana Estefany Passah bad Dabiangsakani Lyngdoh kila pynliem iaka Nihaka Lamare bad Dana Angelika Phyllei.

Haka Open Category Single ka Josefina Dala Passah kala jop pyrshah iaka Pretty M Sumer.

Ha ka Girls Open Doubles ka Josefina Dala Passah bad Pretty M Sumer kila jop iaka Nihaka Lamare bad ka Dana Angelika Phyllei.

Iaki khusnam shaki nongjop la sam da u Working President WJDSA Ma EMH. Passah bad Vice President WJDSA Ma Patrick Lamare haka jingdonlang u District Sports Officer (DSO) Ma Khroobok Passah nalor kiwei kiwei ki dkhot nongkitkam ka WJDSA.