Kut noh ka Behdeiñkhlam jong ka Seiñraij Tuber

Syllad | The Rising MeghalayaJuly 22, 2019

TUBERKMAISHNONG: Ka lehniam Behdeiñkhlam jong ka Seiñraij Tuber kaba dei ruh ka Behdeiñkhlam kaba heh tam ha Rilum Jaiñtia, kala poi noh sha kaba kut haka sngi Nyngkong ha pung kyntang (Aitnar) kaba don ha Tuber Kmaishnong hapdeng ka jingshongkun bad iphuh iphieng.

U Myntri Rangbah ka Jylla u Conrad K Sangma ula wan ban sakhi ha ryngkat ki hajar hajar ki paidbah na kylleng ka ri Khasi bad Jaintia kynthup ruh ia kiba nabar. Nalor u Myntri Rangbah ka Jylla la donlang ki Myntri sorkar u ma Sniawbhalang Dhar, u Kyrmen Shylla, MLA, ki MDC ka JHADC bad kiwei kiwei sahep sorkar bad ki khlieh synshar District kiba kynthup ia u SP bad DC ka East Jaiñtia Hills.

U Myntri Rangbah ka Jylla, u Conrad K Sangma haba kren kum u kongsan ula ong “Ka sorkar ka ïaleh ban pynneh pynsah ïaka kolshor bad ka ai ruh ka jingkyrshan ïa kum kine ki tamasa ban pynpaw sha ka pyrthei ïaka jingriewspah ka kolshor jong ki jaidbynriew ka jylla.”

“Ha kum kine ki tamasa ba ioh ban pyni iaka jinglong tynrai bad ka jinglong kyrpang sha ka pyrthei bad ka Behdeinkhlam ka dei kawei,” la ong u Conrad bad ka sorkar naka por sha ka por ka ieng ban iada iaka riti ka dustur bad ka rukom bat khyndew bat shyiap jong ki trai jylla.

Ka Seiñraij Tuber kala ai dorkhat ruh ha u Myntri Rangbah ban kyrpad ïa u ban pynioh ïaka Gallery, Museum, Cultural Centre bad kiwei kiwei.

Kumba long ha ka Behdeinkhlam ka Seinraij Jowai- ka Behdeiñkhlam ka Raij Tuber ha Tuberkmai Shnong ruh ka la sdang naduh u bnai Lber –Iaiong da ki jingknia bad ka suit ka shor.

Ha aitnar hashuwa ba hiar ki rong ki rup (Rot) ki Wasan kiba kynthup ia u Langdoh, ki Sangot, ki Maji, ki Kitkhoh bad kiwei kiwei kila ai Pyrnah (kyiad kaba don ha u klong) ia ki shnong bapher bapher kiba tip kum ki khun ba shong bri hapoh ka Seinraij Tuber.

Hadien ba dep katei ka jingai Pyrnah ki khun ka Sein Raij Tuber ba kynthup ia palat 30 tylli ki shnong heh bad shnong rit kiba dang bat ia ka Niam-tynrai la wanrah haduh 66 tylli ki Rot ha katei ka pung aitnar.

Hashuwa ban bret pat ia kitei ki rong ki rup la pynkut ia katei ka jinglehniam ha katei ka pung da ka Iatan Bhang bad mynta ka kynti ka Phang Nein kala jop pyrshah iaka Phangwah kaba la ngeit ba mynta u snem ka kamai kajih kan biang, u khaw u kba un bha bad kin ioh ka jingkoit jingkhia bad kin roi kyrhai ha kaba kan ym jia ruh kano kano ka nemsniew.

Ka lehniam Behdeinkhlam ka Seinraij Tuber ka phah ia ka khubor halor ka jingpyrshah ia ka jingkyrni ban dih iaki jingdih pynbuaid, ban iakhun ban pyndam ïaka jingphah trei jubor ïaki khynnah bad ka jingpynjot ia ka mariang nalor ban long kiba lehkhuid iaka sawdong sawkun ka mariang.