Kut noh ka Behdeinkhlam ka Raij Mukhla

Syllad | The Rising MeghalayaAugust 21, 2024

Wat hapdeng ka jingther u lap bah, ka lehniam Behdeinkhlam kaba khatduh eh jong u snem kaba la pyndep da ka Seinraij Mukhla ha rilum Jaintia kala poi noh sha kaba kut haka 20 tarik Nailar hapdeng ka jingiphuh iphieng ba la shim bynta da ki riewngeit kiba dang bat iaka Niamtre.

U Myntri ka sorkar Jylla u Bah Kyrmen Shylla ula wan sakhi iaka lehniam haka jingdonlang u MLA ka Jowai u Bah Wailadmiki Shylla, u Deputy CEM JHADC Laksy Rymbai, bad kiwei ki MDC ba kynthup ia u Lakhon Dkhar, J Treilang Suchiang, Ailad Bhoi, u Doloi Nangbah, ki nongialam Seinraij na Jowai, Tuber bad na kiwei kiwei.

“Wat la iaka khlam jingpang Corona kaba ym shym la poi pyrkhat ba kan duh kan dam, hynrei la lah ban pynduh iaka haka jylla, wat la katta nga pynpaw ka jingsngewkhia namar bym lah pat ban pynduh pyndam iaki katto katne ki khlam kiba don haki riew shimet kumjuh ki longiing longsem kata kadei ka bishni ka at-nud bad ka jingpeit poh iwei ia iwei”, la ong u Bah Kyrmen Shylla bad bynrap ba u don ka jingkyrmen ba lyngba jong kane ka Behdeinkhlam yn lah ruh ban beh ia kane ka khlam na uwei pa uwei u briew.

Ula ai khublei bad kitbok kitrwiang iaki baroh ki khun ka Seinraij Mukhla ban ioh ka met ka phat kaba koit ba khiah, ban bha ka rep ka riang bad ban ioh ka kamai kajih kaba dap ba biang.

Ka Sein Raij Mukhla man u snem ka la pynlong ia kane ka lehniam ha ki saw sngi lynter bad mynta u snem kane ka lehniam ka la sdang naduh ka 17 tarik Nailar. Ha kane ka lehniam ka la don ki jingknia bapher bapher kiba kynthup ia ka leit pom dieng Blai ne Khnong lai tylli, ia kine ki dieng Blai la wanrah sha madan Tih Khyndaw.

Shuwa ban shad ha biar la don ka kynting khnong Blai bad ka knia Khlam Ram Shyllang kaba la leh ha duwan knia kaba don hajan ka Law Kyntang ka shnong Mukhla, ka la don ruh ka knia Ryngkaw bad ka Tyngkhain Khnong bad ia kine ki khnong la wanrah sha Biar bud pat sa ka jingwanrah ia ki rot sha ka Biar.

Haka nohphai sngi u Langdoh, u Sangot, ki maji, u chutia bad ki riew rangbah ki la iakynduh ha madan Slot Masi bad la wanrah ruh shi jaka iaki Lai tylli ki rot ba la wanrah da ka Umlangshor, Neiñshnong bad Wahshnong ban pynhiar sha Aitnar.

Hashwa ban pynhiar iaki rot, la pynhiar shwa ia ki 3 tylli ki Deiñkhlam ba la pynieng ha madan Tihkhyndaw bad hadien ba la pynhiar lut iaki deinkhlam la pynhiar sa iaki rong ryngkat ka bom ka bhuri bad ka shad ka kmen.

Mynta u snem la don haduh 13 tylli ki rot kiba la wanrah sha ka Biar ryngkat ka shad ka kmen ka risa ka kynhoi bad hadien bala dep ban pynshad iaki rot la bret pat iaki kum ka dak ka jingpynkut iaka lehniam Behdeinkhlam.