Kut noh ka Behdeiñkhlam ka Raij Muthlong
JOWAI: Ka lehniam Behdeiñkhlam jong ka Seinraij Muthlong kaba pynlong manla u snem kala poi sha kaba kut haka 8 tarik u Nailar ha Biar Nohrong Raij Muthlong, Thadmuthlong.
Ha kane ka jingnoh rong la wan ban ïashimbynta naduh ka Raij Thadsning, Rushai, Thad Muthlong Pyllun, Muthlongrim, Latymphu, Sein Raij Mukhap, Rashai bad Pammanik bad haduh 20 tylli ki rong la pynpoi ha biar Nohrong jong ka Muthlong.
![](https://www.syllad.com/wp-content/uploads/2024/09/JIT-Vacancy-823x1024.avif)
La wan sakhi ia kane ka lehniam da u Symbud Myntri Rangbah ka sorkar Jylla u Bah Prestone Tyngsong, U Myntri ka tnad PHE Samlin Malngiang, U Myntri ka tnad Pule Puthi u Ma Lahkmen Rymbui bad U Myntri ka tnad Fisheries & GAD Comingone Ymbon nalor ki MDC ka JHADC bad ki spah ngut ki paidbah kiba la wan na kiwei kiwei pat ki Raij kum ka Jowai bad Tuber.
U Bah Prestone Tyngsong haka jingkren ula kitbok kitrwiang ia ki khun ka Seinraij Muthlong ba kin roi ki par bad ioh ka me kaba koit kaba khiah.
Ka Seinraij Muthlong kala ai da dorkhat ha u Bah Tyngsong bad Bah Malngiang ban dawa ban pynioh iaka surok ban leit sha Biar bad ki Painkhana paidbah. Kine ki arngut ki myntri sorkar kila kular ban shimkhia ban pynioh iaka jingdawa ka Seinraij Muthlong.
Kane ka lehniam Behdeiñkhlam ka la sdang da ka lehniam knia ‘Shain’ ka lehniam ‘Wator Symbe’ ka lehniam “Sang sngi khlam” ka “ïuñ Talawiar Chnong” bad haka sngi ba khatduh la pynkut iaka lehniam da ka jingpyndep iaka “Knia khlam” da ki Waheh Wasan, u Langdoh bad u Chutia.
Leave a Reply