Kut noh ka Behdeiñkhlam ka Seinraij Ialong

Syllad | The Rising MeghalayaAugust 7, 2022

Kumba ju long manla ka snem, ka shad Behdeiñkhlam jong ka Seinraij Ialong bad Wahiajer kala poi sha kaba kut noh hapdeng ka jingiphuh iphieng mynta ka sngi

U president ka Senraij Ïalong u Ma Pyrkhat Shylla haka jingkren ula ong ka jingpyndep ïaka shad niam kalong na ka bynta ban ainguh ai dem ïaki jingkyrkhu ba la ïoh bad ban kyrpad kyrpon hakhmat u nongbuh nongthaw ban nangtheh ki jingkyrkhu kyrdoh ban nangïoh shuh shuh ki khun ka shnong ka Raij ïaka roi roi ka par, ka imsuk imsaiñ bad ban im miat im bha.

U myntri sorkar u Dasakhiatbha Lamare, u Shitlang Pale MLA Sutnga-Saipung, u Wailadmiki Shylla MLA Jowai, u Pa Dolloi ka Elaka Jowai ma Puramon Kynjin, u Andrew Shullai, MDC JHADC, u Lakhon Biam, MDC-JHADC, ki nongialam niam ka Seinraij Jowai, Tuber, Chyrmang bad kiwei kiba la shah khot sngewbha.

Ki rot ki rong baroh kiba la pynïeng ban pynphuh pynphieng ïaka Shad Niam Behdeinkhlam ki don haduh 12 tylli kiba la shna pynwadur haki rukom bapher da ki dong ba don hapoh ka shnong Ïalong kumjuh kiba la wanrah da ki khun ka Niamtre na Wahïajer.

Ki rukom jong ka lehniam ha kane ka janmiet kadei ka jingai pyrnah da u Langdoh sha ki dong ki shnong kiba wanrah ïaki rot ki rong.

Nangta haka bynta kaba kut hadien ka jingbret ïaki rot ki rong, pynbud pat ka jingïatan ïaki lai tylli ki bhang hapdeng ka jingïashim bynta ki khun ka Raij kaba long katkum ka rukom ba la pynjuh ne hikai kiba rim ba jah ha kum kane ka por ka samoi.