Kut noh ka Behdeiñkhlam ka Seinraij Kongwasan Chyrmang

Syllad | The Rising MeghalayaApril 28, 2024

Ka Seinraij Kongwasan Chyrmang kadei kawei na ki raij kaba la ju pynlong nyngkong eh iaka Behdeinkhlam hapoh Rilum Jaintia haka 28 tarik Ïaiong ka la pynkut noh iaka lehniam Behdeinkhlam ba shisien shisnem hapdeng ka jingtynnad jong ka mariang.

Kane ka lehniam Behdeinkhlam ba lai sngi lynter la sdang haka 26 tarik Ïaiong da kaba u Langdoh Kongwasan Chyrmang ryngkat kiwei ki shakri niam ka Raij kila pyndep ïa bynta jong ka lehniam haduh ban da poi ka sngi khatduh jong ka lehniam Behdeinkhlam.

Ka Behdeinkhlam ba la pyndep da ka Seinraij Kongwasan Chyrmang kadei ka jinglehniam hashwa ba ki khun ka Raij kin hiar sha ki hali ki pyntha ban pynhap ia u symbai u rynai, ban bha ban miat u kba u khaw ban dap ban biang ka iing ka sem bad ban beh iaka khlam ka smej napoh ka shnong ka raij.

Ki rukom ka lehniam ne kñia ainguh kiba la pyndep da ki shakri niam ka Raij ki long Than blai, Thoh Langdoh knia Ryngkaw, Hat Khrong, ka Kamcharoh blai, Chad Ïung thyndai, Boh Synrum katba haka 28 tarik, ki rukom lehniam la pyndep iaka Chad Thyndai, Seh Bhang ha Khloo blai ryngkat ka nguh ka dem ka suit ka shor, ka jingshad ha Ïung Langdoh, ka jingpynkhein ‘Khnong blai’, ka jingpynhiar iaki ‘Charoh blai’ sha Aitnar.

Ki rot ki rong baroh kiba la wanrah ban pynphuh pynphieng ïaka shad Behdeinkhlam ki don 7 tylli hapdeng ka jingkynud ki sur jong ka bom ka bhuri bad la pynphuh pynphieng bad pynshongshit iaka shad Behdeinkhlam da ka jingïashim bynta lang ruh ki khun samla kynthei haka riam ka beit ba bun rukom.

Hadien ka jingbret rot la pyndep ruh iaka lehniam Ïadaw Charoh.

Nalor ki khun ka Seinraij Kongwasan Chyrmang, la wan ban sakhi ruh da u MLA ka thaiñ Bah Lakhmen Rymbui, Dolloi ka Elaka Jowai Bah Puramon Kynjing, ki nongialam ka Seinraij Jowai kynthup naduh u President Bah Hercules Toi, General Secretary Arwotki Sumer bad kiwei kiwei ki nongialam na ki Seinraij bapher ka ri Jaintia.