Kut noh ka Behdieñkhlam ka Seiñraij Mukhla

Syllad | The Rising MeghalayaAugust 20, 2021

Ka lehniam Behdieñkhlam 2021 jong ka Seiñraij Mukhla ka la poi sha kaba kut haka sngi Thohdieng hadpeng ka jingshongkun watla hap ban pynrit iaka jinglehniam namar ka jingwan sar ka khlam COVID-19.

Ka Behdeinkhlam ka Raij Mukhla ka long kawei napdeng ki jinglehniam Behdieñkhlam kaba pyndep khatduh eh ha Rilum Jaintia manla u snem.

Mynta ka kynti la wan poi 9 tylli ki rot ha pung aitnar ka Seiñraij Mukhla kiba la wan rah na ki dong bapher bapher ka Mukhla.

La wan sakhi ïa kane ka Behdieñkhlam da u MLA Jowai U Ma Wailadmiki Shylla, Puramon Kynjing Dolloi Elaka Jowai, u Ailad Bhoi MDC ka thain, U Octomewot Lamin Nominated MDC nalor kiwei kiiwei.

U ma Wanbha Lyngdoh, Langdoh ka Raij Mukhla ula ong ba ka jingpyndep iaka niam ka rukom kala long kaba iaid beit iaid ryntih kaba pynhun iaki blei ki syiem bad kyrmen ba kane ka Behdieñkhlam kan wanrah iaka roi ka par, ka bha ka miat ka imlang sahlang khamtam eh ban beh iaka sniew ka smen ka khlam ka ngoh.

Hashuwa ban noh iaka rong ki rup, ka lehniam kala sdang naduh ka 6 baje mynstep daka jingkyntin Khnong da ki Khun ka Seiñ Raij Mukhla ha iing (Iung) Langdoh jong ka dong Mukhla Nongrim bud sa ka Shad ka duwai ka phirat ha kawei pa kawei ka long iing da ki wasan

Haka por nohphai sngi la rah ïa ki rot ha Madan Slot Masi bad ha ka por 2 baje pat la pynmih ïa ka khnong (Dieñkhlam) na ka Mukhla Wahshnong, Neiñshnong bad ka Mukhla Umlangshor hadien kane la pynhiar ia ki rong (Rot) sha ka Ainar jong ka Mukhla Raij kaba dei ka jaka noh ïa ka ki rot bad pynkut ia kane ka lehniam.