Kut noh ka Behdieñkhlam Tuber ba heh tam ha rilum Jaintia, poi haduh 54 tylli ki tabut ha biar

Syllad | The Rising MeghalayaJuly 22, 2022

Da ki hajar ngut ki khun ka Niamtre ki la wan hiar sha ka biar ne ka pung kyntang ban sakhi iaka jingpynkut iaka Behdieñkhlam kaba heh tam ha rilum Jaintia ha Tuberkmaishnong, East Jaintia Hills District haka sngi Thohdieng.

Hadien ka jinghap ban pynrit iaka jinglehniam Behdieñkhlam ha kine ki ar snem na ka jingwan lyngshop ka khlam COVID-19, mynta ka kynti u paidbah khamtam ki riewngeit Niamtre ula mih ryntih ban shimbynta shitrhem ha ka Behdieñkhlam kaba la sdang naduh ka 19 tarik une u bnai.

Ki Kynrem ki lyndan kiba wan sakhi ia kane ka Behdieñkhlam ki kynthup iaki ar ngut ki Myntri sorkar Jylla u Bah Renikton Lyngdoh Tongkhar, u ma Kyrmen Shylla, CEM JHADC ma Thombor Shiwat nalor kiwei kiwei MDC JHADC, u Deputy Commissioner, East Jaintia Hills Abhilash Baranwal, u dolloi elaka Jowai ma Puramon Kynjing nalor ki nongialam ka Seinraij Tuber ba kynthup ia u president u ma R Harvis Phawa, General Secretary Jobly Sana bad kiwei kiwei.

U Myntri rangbah ka Jylla u Conrad K Sangma bad u Speaker ka ïing dorbar u Bah Metbah Lyngdoh ki ai khublei Behdeiñkhlam bad jingkyrkhu kyrdoh ïaka khun ka khun ka Seiñraij Tuber lyngba ka Video Conference.

U Kyrmen Shylla bad ha kane kajuh ka sngi u Bah Kyrmen ula aiti ïaka work order kaba 26.50 lak tyngka na ka bynta ban shna ïaki nala, ki lynti ïaid kjat haki sawdong sawkun ka Biar.

U Bah Renikton Lyngdoh Tongkhar bad u Kyrmen Shylla ki la ai khublei Behdieñkhlam ïa baroh ki khun ki hajar ka Seiñraij Tuber bad kyrkhu kyrdoh ba kin ïoh ïaka met ka phad kaba shait ka khlaiñ bad ban biang ka kamai kajih ban roi ban par salonsar ha baroh ki liang.

U Ma Bewill Shylla President ba barim ka Seiñraij Tuber kum ka jingpynkynmaw ula pule ïaka dorkhat kaba ka Seiñraij Tuber ka la aiti sha u Myntri Rangbah ka Jylla ha u snem 2019 kaba ki la kyrpad ban shna ïaka jaka peit kai paidbah ne Public Viewing Gallery, Museum bad ka Cultural Centre.

Ha kane ka kynti haduh 54 tylli ki tabut ne ki rot la wan pynpoi ha biar ryngkat ki khubor ban beh shajngai iaka sniew ka smeh ka imlang ka sahlang. Nalorkata la don ruh ka tabut kaba la buh da ka dur jong u Vidalamir Putin bad ki Missile kiba hiar thma ïaka Ukraine.

Ïaka lehniam bapher bapher jong ki “Soo sngi Le ïaw” la pyndep da u Lyngdoh, Wasan, Sangoh bad kiwei.

Haba pynkut ïaka Behdeiñkhlam ka la don ka jingïalympat bad ka jingïatan bhang. Ha kine ki ar tylli ki jinglehniam ka phang neiñ kala jop bad la ngeit ba un miat un bha u kba u khaw shaka phangñein.