Kut noh ka Cabinet Retreat ba 2 sngi: Bthah u CM ia baroh ki Tnad sorkar ban trei sha ka thong jong ka roi ka par

Syllad | The Rising MeghalayaJanuary 12, 2025

Ka jingialang ba ar sngi jong ka Kynhun Myntri kaba la long ha Sohra ne ka Cabinet Retreat hapoh ka jingialam jong u Myntri Rangbah ka Jylla u Conrad K Sangma ka la kut noh ha ka 11 tarik u Kyllalyngkot.

Ia kane ka cabinet retreat la phiah ha ki artylli ki bynta, ha kaba ki heh ophisar sorkar ki la pynpaw ia ki jingeh bad ia ki sienjam ban ialeh pyrshah ia kine ki jingeh khnang ban kyntiew ia ka roi ka par ha ka jylla.

Kane ka cabinet retreat kaba dei kaba nyngkong eh ka ban ailad ia baroh ki tnad sorkar ba kin ia wan lang ha kajuh ka rynsan ha ka jingiadon lang jong baroh ki Myntri sorkar bad ban iamir jingmut lang halor ki sienjam halor ka jingiaid lynti ka Jylla Meghalaya sha ka roi ka par – Vision 2032.

Kane ka jingialang ka la pynleit jingmut halor ki sienjam ban kyntiew ia ka imlang sahlang bad halor ki jingtei kiba donkam bad la iatai ruh halor ki jingeh kiba donkam ia ki sienjam kiba kongsan kiba dei ban shim ha kaba iadei bad ka pule puthi bad ka koit ka khiah.

Ki mat ba kongsan ia kiba la ithuh da ki tnad sorkar kin long shibynta ban pynurlong ia ka thong jong ka sorkar ban trei bad ban shimkhia ia ki jingeh bad ban pyniaid shakhmat ia ka ioh ka kot bad ka roi ka par ha ka jylla.

Na ka liang u Myntri Rangbah u la bthah ia ki tnad sorkar ba kin ai ka jingiatreilang kaba jan khnang ban poi sha ka thong jong ka jingjop ha ki bynta bapher bapher ha ka liang ka roi ka par.

Ka jingiamir jingmut kan long ruh shibynta jong ka jingpynpaw kaba da ki kam bad ka jingbuh thong kaba ka sorkar ka la buh ban pynthikna  ba ka Meghalaya kan kylla long ka jylla kaba don ha ka kyrdan kaba 10 hapoh ka ri.

Ha kane ka jingialang ba la wan iashim bynta ruh da ki Myntri sorkar, ki heh ophisar sorkar bad ki Deputy Commissioner, na ka liang u Myntri Rangbah u la pynpaw ba kane ka jingialang ka long kaba seisoh bad kaba plie ia ki khmat.

“Kane ka jingiamir jingmut ka la long kaba seisoh, bad nga don ka jingkhmih lynti ban pyniaid shakhmat ia kane ka lynti kaba ngi la pynwandur. Ki bynta kiba kongsan na kane sienjam ka long ban don ia ki jingtrei bad ban pynurlong ia ki thong ba la buh nalor ka jingbuddien kaba man ka por khnang ban pynthikna halor ka jingpyntreikam ia ki skhim, ki prokram bad ki project,” u la ong.

Nalor kata u la kyntu ia baroh ki tnad sorkar ba kin don ia ki jingbuh thong kaba da ka por ha kaba iadei bad ki rukom treikam khnang ba kine ki jingbuh thong kin long kiba lah ban pyntreikam.

U la kyntu ruh ia ki ophisar sorkar kumjuh ia ki Myntri sorkar ba ki dei ban leit jurip man la ki por sha ki jaka kiba dei  bad ban pyniajan bad ki paidbah.

“Ka jingleit jurip sha ki jaka kan pynioh ia ki jingtip ba thikna ia kiba yn ym ioh tang lyngba ki kaiphod. Kane ka jingleit kaba da lade sha ki shnong ki thaw ka long kaba kongsan ban sngewthuh halor ki jingdonkam ba shisha bad halor ki jingeh,” u la bynrap.

Kumjuh u Myntri Rangbah u la kyntu ruh ia ki Deputy Commissioner ba kin pynlong ia kum kane ka juh ka prokram ha ki kyrdan jong ka district ha ryngkat bad la ki jong ki kynhun.

U Chief Secretary ka jylla u Bah DP Wahlang u la ong ba kane ka jingialang ka la plielad ia ki tnad sorkar ba kin ioh ia ka lad ban iasam ia ki jingtip bad ka ban iarap shibun ban don ia ka jingiatreilang kaba jan.

Haba ai ka jingiaroh ia u Myntri Rangbah halor ka jingpynwandur ia kane ka retreat, u Chief Secretary u la ong, “Ka dei kaba aijingmut shibun bad kaba pynphei phang.Kan ka lah ban dei ka prokram kaba nyngkong eh hapoh ka ri ia kaba dei ban pyntip sha u Myntri Rangbahduh ka ri.”

Leit jngoh u CM bad ki dkhot ka kynhun Myntri ia ka jingkieng ‘Living Root Bridge’ ha ka shnong Siej