Kut noh ka Inter School Athletic Meet u DSO East Khasi Hills & la jied 70 ngut ki nongialehkai sha ka State Level

Syllad | The Rising MeghalayaMay 9, 2019

SHILLONG: Ka ophis jong u District Sports Officer (DSO), East Khasi Hills District, Shillong ha ka 9 tarik u Jymmang 2019 ka la pynkut noh iaka lympung ialehkai kaba la tip kum ka District Level Inter School Athletic Meet 2019 kaba la sdang naduh ka 7 tarik haduh ka 9 tarik u Jymmang 2019 ha J.N Sports Complex, Polo, Shillong.

Ka jingpynlong ia kane ka jingialehkai ka long kum shibynta ban sei madan iaka sap ka phong jong ki khynnah kiba hapoh 14 snem, hapoh 16 snem bad hapoh 18 snem ka rta kiba pule ha ki skul bapher bapher hapoh ka East Khasi Hills District bad ki khynnah kiba kynsai kin ioh pat ka lad ban mihkhmat iaka District sha ka State Level Competition bad kiwei pat ki lympung ialehkai ki ban salong shen.

Ha kane ka lympung ialehkai la don haduh 869 ngut ki nong ia shimbynta naki 46 tylli ki skul kynthup lang ruh bad ki College na sor Shillong bad na kiwei kiwei ki bynta jong ka District.

Ha ka sngi khatduh la pynhap pyrda noh ia kane ka jingialehkai da I Director jong ka tnat Sports Kong W.A.M Booth bad la ia don ryngkatlang ruh u Assistant Director Bah Jasper Marak, District Sports Officer jong ka East Khai Hills Bah Daniel Dan, District Sports Officer jong ka West Jaintia Hills Bah Hering Shangpliang, ki officer  balah shongthait Bah George Lyngdoh bad Bah S.M Lyngdoh, C.E.O ka M.F.A Bah Arki Nongrum bad kiwei kiwei.

Ha kane ka sngi ba la kut kane ka lympung la sam ruh ïaki khusnam sha ki Best Athlete, Best Team bad la pynbna kyrteng ruh iaki khynnah ialehkai ki ban mihkhmat iaka District shaka State Level Competition.

Ka coaching camp nabynta baroh ki khynnah kiba shah jied ban mihkhmat iaka District kan sdang noh naduh ka 13 tarik mynta u bnai ha J.N Sports Complex, Polo, Shillong.