Kut noh ka “Inter-School Chess and Scrabble Tournament” ba ar sngi ha Jowai

Syllad | The Rising MeghalayaMay 27, 2024

Ka jingpynlong ia ka “Inter-School Chess and Scrabble Tournament” na ka bynta ki skul kiba don ha sor Jowai ka la kut noh ha ka 25 tarik mynta u bnai ha Government Girls Higher Secondary School ha Jowai ha kaba ki la don baroh haduh 140 ngut ki khynnah skul kynthei bad shynrang kiba la wan iashim bynta. Kane ka tournament kala sdang haka18 tarik Jymmang.

Ki nongjop ha ka jingialehkai Chess ha ka liang ki kynthei ki kynthup ia ka Geliloth Nazarene S. Kyndiah ha ka kyrdan kaba nyngkong, bud sa ka Nandani Sinha ha ka kyrdan kaba ar bad ka  Ledawanki Talang ha ka kyrdan kaba lai, baroh kiba la mihkhmat ia ka Government Girls Higher Secondary School.

Katba ha ka liang ki shynrang u Zephaniah R Dkhar napoh Ches Stars Higher Secondary School u la wan ha ka kyrdan kaba nyngkong, bud sa u Braxton Ryan Lamare ha ka kyrdan kaba ar bad u Damiki Nartiang ha ka kyrdan kaba lai kiba dei na ka QC Springside Higher Secondary School.

Ia ka jingialehkai kaba khatduh ha ka Chess tournament la pynlong hadien laitylli ki round ba la pynlong ha ka sngi kaba Nyngkong, bad ha kane ka sngi kut lyngba ki sawtylli kiwei pat ki round, kata da kaba la pynshong nongrim ia ki nongjop lyngba ki point na baroh ki hynniew tylli ki round.

Katba ha ka jingialehkai Scrabble la sdang ia ka jingiakop shisyndon haka quarter final bad pynkut ia ka final ha ka 25 tarik mynta u bnai ha kaba ka Riwinia Bamon na North Liberty Higher Secondary School ka la ioh ban rah ia ka nam lahduh, bud sa ka Susandaroi Rabon na Government Girls Higher Secondary School ha ka kyrdan kaba ar bad u Jedidiah Passah napoh HK Singh Memorial Secondary School ha ka kyrdan kaba lai.

Ia  kane ka tournament la khot pynlong da ka Ophis u Deputy Commissioner, West Jaintia Hills, ha ryngkat ka jingiatreilang bad ka Ophis District Planning Officer, Jowai, ka Jaintia Hills Chess Association bad ka  Meghalaya Chess Association shibynta ban kyntiew ia ki sap ki phong jong ki khynnah skul ha kine ki jait jingialehkai sports.