Kut noh ka Jaiñtia Hills District Chess Competition cum State ‘B’ Tournament ha Jowai, yn mih khmat 6 ngut sha ka State Level

Syllad | The Rising MeghalayaJune 9, 2024

Ka lympung ialehkai kaba tip kum ka “Jaiñtia Hills District Chess Competition cum State ‘B’ Tournament” kaba la pyniaid da ka Jaiñtia Hills District Chess Association (JHDCA) kala poi noh sha kaba kut haka 8 tarik Jylliew ha Hall jong ka Thomas Jones Synod College Jowai.

U Ma P. Lhuid President ka Jaiñtia Hills District Chess Association haka jingkren ula ong lyngba kane ka lympung yn jied 6 ngut ki khynnah ban mihkhmat iaka District shaka State Championship ka ban sdang naduh ka 12 haduh 15 tarik Jylliew ha nongbah Tura.

U Ma Khroobok Passah, Assistant Director ka tnad Sports bad District Sports Officer (DSO), West Jaintia Hills uba long kum u kongsan ula ai khublei iaka Jaiñtia Hills District Chess Association kaba la pynlong ia kane ka lympung kaba long ka jingialehkai.

Ha kane ka sngi la ai sngewbha ruh iaki khusnam sha ki arngut ki khynnah kynthei kiba iashim bynta ha kane ka lympung kumjuh iaki khynnah kiba hapoh 13 snem bad 17 snem rta.

Ki nongjop haka Open Category ki long u Roben Suting, Dapmon Bang bad Elangki Rymbai katba haka Under 17 Category ki long u Zephaniah R Dkhar, Braxton Ryan Lamare bad Leon Raymond Rymbai.