Kut noh ka jingialap ilekshon na ka bynta ka Tura bad Shillong Parliamentary seat

Syllad | The Rising MeghalayaApril 18, 2024

Ka jingialap jong ki seng sain pyrthei na ka bynta ka ilekshon Lok Sabha ka la kut noh ha ka 17 tarik mynta u bnai ha ka por 4 baje janmiet, ha kaba ki 48 kynta ki ban wan kin long ki kynta jong ka jingjar-jar hashuwa ban leit sha ka jingiathep vote ka ban long ha ka 19 tarik mynta u bnai.

Baroh ki don hynriew ngut ki kyrtong ki ban ia aireng napoh Shillong parliamentary constituency. Kine ki kynthup ia u MP ba mynta ka party Congress u Bah Vincent H Pala, ka kyrtong ka National Peoples Party (NPP) ka Kong Ampareen Lyngdoh, u kyrtong ka Regional Democratic Alliance (RDA) u Bah Robertjune Kharjahrin, u kyrtong ka Voice of the People Party (VPP) u Dr Ricky AJ Syngkon bad ki  kyrtong shimet kiba kynthup ia u Prof Lakhon Kma bad u Peter Challam.

Na ka liang u Chief Electoral Officer (CEO) u Dr BDR Tiwari u la ong ba ka por jong ka jingjarjar ka la sdang naduh ka por 4 baje jong ka 17 tarik mynta u bnai bad ba ki party sain pyrthei kim lah shuh ban dang pynlong ia ka rally ne kino kino ki jingialap ilekshon lait noh tang kaba leit rung sha ki iingbriew bad iakynduh ia ki briew.

“Ka jingialap bad ka jingiamir jingmut kaba para marwei kan don hynrei la khang pyrshah ban pynlong ia ka jingialap da ki seng sain pyrthei ha kine ki kynta kiba jar jar,” ong u Tiwari.

Na ka liang u District Magistrate ka East Khasi Hills u la pynjari da ka kyndon section 144 CrPC kaba la khang pyrshah ia kano kano ka jingialum briew ba beain bad ka jingynlong ia ki jingialang paidbah ne kino kino ki jingleh jingkam ha kine ki 48 kynta kat haduh ka sngi thep vote ha ka 19 tarik mynta u bnai.Ka hukum ka khang pyrshah ruh ban pyndonkam ia ki tynghung pynsawa khlem da ioh ia ka jingbit kaba biang.

Kumjuh u CEO ula pyntip ba na ka liang ka EC kala ioh pdiang haduh palat 60 tylli ki jingujor ba pynkhein ia ka Model Code of Conduct lyngba ka C-Vigil bad kiwei kiwei, kata da kaba ong ruh ba ki la shimkhia ia kine ki jingujor bad pan ruh ia ka kaiphot bad ki don ruh ki bynta kiba ngi la pynlong ka jingtohkit bad bun ngi shem ba ki khlem pynkhein ia ka MCC.