Kut noh ka jingrakhe pynneh pynsah mariang ha Eastern West Khasi Hills

Syllad | The Rising MeghalayaJune 8, 2022

Ka jingrakhe ia ka taiew pynneh pynsah mariang ne ka World Environment Week kaba pynlong da ka ophis u Deputy Commissioner, Eastern West Khasi Hills District ha ryngkat ka jingiatreilang bad ka Basin Development Unit, West Khasi Hills District, Nongstoin kaba sdang naduh 31 tarik Jymmang kala poi noh sha kaba kut haka sngi Balang haka prokram kaba la pynlong ha Tirot Sing Memorial Hall, Pyndengumiong, Mairang.

U kongsan u dei u Syiem ka Hima Nongkhlaw, u Pa’iem PM Syiemlieh haka jingdonlang u Deputy Commissioner ka Eastern West Khasi Hills District, u Bah W Nongsiej, u BDO ka Mairang Block, u Bah C.P Mawkon, ki nongtrei jong ki tnat sorkar bapher bapher hapoh ka distrik, ki nongialam shnong, ki nonghikai bad ki khynnah pule.

U Syiem ka Hima Nongkhlaw, u Pa’iem P.M Syiemlieh u la khot la wer ia baroh kiba la iadon lang ha kane ka prokram ba kin shim halade ia ka jingkitkhlieh ban iada bad ban pynneh pynsah ia ka mariang namar u bynriew u don tang kawei ka pyrthei ba un shong un sah.

Haba kren halor ka rukom pynneh mariang jong ki riew hyndai lyngba ka jingsumar jongki ia ki khlaw ki btap, u kongsan u la kyntu ia baroh ban iatreilang ryntih ha ki kam thungdieng bad ruh ha ka ban sumar iaki na ka bynta ban kyntiew bad pynneh pynsah ia ka mariang bad ki sawdong sawkun jongka.

U Deputy Commissioner ka  Eastern West khasi Hills District ha ka jingkren jong u, u la kren shaphang kiba bun ki jnit ki jnat kiba iadei bad ka mariang kiba kynthup ia ki jait jingpynjulor ia ka na ki daw kiba bun kiba kynthup ia ka jingroi stet u paidbynriew ha sla pyrthei bad ka jingdon jong ki karkhana ba bunjait bad u la ban ruh halor ka jingshisha ba ka kam pynneh mariang kam dei ka kam kaba shisngi hynrei kaba dawa ia ka jingiatreilang lang bad jingtreishitom da baroh ki paidbah ha ka jingim kaba man ka sngi lyngba ki kam ki duk ki jongki.

Ha kane ka prokram la ioh ruh ban sam ia ki khusnam sha ki khynnah skul hapoh ka distrik kiba la jop ha ka jingiakob iatyrko nia, thoh ese bad dro jingdro  ia kiba la pynlong kum shibynta jong ka jingrakhe ia ka Taiew Pynneh Mariang mynta u snem.

La ioh ruh ban sam ia ki khusnam Best Village Natural Resources Management Committee (VNRMC) sha ka VNRMC jong ka shnong Lyngdoh Maram kaba hap hapoh Mairang Block bad ka VNRMC ka shnong Nongshillong kaba hap hapoh Mawthadraishan Block SDPRO Mairang