Kut noh ka jingtyrwa pynbeit constituency JHADC da ka jingpyrshah kiba bun ki shnong ha East Jaintia Hills

Syllad | The Rising MeghalayaJuly 12, 2024

Ka jingtyrwa pynbeit thymmai iaki Constituency da ka Delimitation Committee jong ka Jaintia Hills Autonomous District Council (JHADC) kala kut noh haka 11 tarik Naitung da ka jingpyrshah kiba bun ki shnong hapoh ki 10 tylli ki Constituency kiba hap ha East Jaintia Hills District.

Kane kala paw haka public hearing ne ka jingpynsngew paidbah kaba khatduh ba la khot pynlong da ka Delimitation Committee jong ka JHADC kaba la long ha Community Hall Khliehriat West, East Jaintia Hills District.

Ki 10 tylli ki Constituency kynthup ka Muthlong-Sohkymphor, Tuber, Musniang-Rangad, Rymbai-Khliehriat, Sutnga-Narwan, Sutnga-Nongkhlieh, Sumer, Saipung-Nongkhlieh, Narpuh bad Bataw-Lakadong.

U Arborhima Darnei MDC Saipung ula ong ka Saipung Constituency kaba la shong la sah da ki jaitbynriew Biate kadei kaba kyrpang namar ka iapher na kiwei ki Constituency hapoh ka Jylla bad ka iapher bak ly bak naduh ka riti dustur, ka kolshor, ka rukom shongkha shnongman nalor kiwei kiwei ki rukom im.

Shuh shuh ula ong ba naduh u snem 1967 u Governor ula ailad iaki nong Saipung ban don noh la u jong u nongmihkhmat hapoh ka District Council khnang ban iada iaka riti dustur jong ki jaitbynriew Biate.

Ka jingpynrung iaki shnong Pnar hapoh ka Saipung Constituency da ka Delimitation Committee suki suki ka jaitbynriew Biate kan sa duh sa dam halor ba kala dei lupa ka jaitbynriew kaba ritpaid, la ong utei u nongmihkhmat na Saipung.

U ngeit skhem ba ki shnong Pnar kiba shah pynrung hapoh ka Constituency Saipung wat ma ki ruh kin ym hun ban don hapoh ka Saipung Constituency bad ula kyntu iaka Delimitation Committee ban pynneh iaka Saipung Constituency kumba ka ju long mynshwa.

U Justine Dkhar MLA barim Khliehriat ula pynpaw ka jingsngew phylla ba iaka Dkhiah East la pynkynriah sha Sutnga-Narwan Constituency katba iaka Diengshynrum pat ka pynhap sha Sutnga-Nongkhlieh kiba dei ki shnong kiba don hajan tam ka District Headquarter, Khliehriat bad ula dawa na ka delimitation committee ban pynneh ha Rymbai-Khliehriat iaki 5 tylli ki shnong kiba hap hapoh ka Khliehriat Township.

Ki Lai shnong kynthup ka Huroi, Lejri bad Lahalein kila pyrshah iaka jingshah pynkynriah sha Bataw-Lakadong bad ki dawa ban pynneh hajuh ha Narpuh namar ka pynsuk iaki haka leit ka wan.

Ka shnong Chiehruphi ruh ka pyrshah jur iaka jingshah pynkynriah naka Narpuh sha Sutnga-Nongkhlieh kumjuh ka shnong Nongsning, Mynkre ruh ki pyrshah iaka jingshah pynkynriah shaka Sutnga-Nongkhlieh.

Kiba bun hi ki shnong kila dawa ban pynneh ha ka MDC constituency kaba ki don mynta bad kila pynpaw iaka jingpyrshah kaba jur ia kane ka jingtywa thymmai ka delimitation commmitee.

Kino kino kiba don ka jingpyrshah ki lah ban phah da ka jingthoh sha ka delimitation committee ha lane shuwa ka 19 tarik Naitung 2024 hapoh 3 baje nohphaisngi.