Kut noh ka lehniam Behdienkhlam; kular u CM ia ka jingkyrshan ban kyntiew ia ka kolshor

Syllad | The Rising MeghalayaJuly 4, 2024

Ka lehniam Behdeinkhlam kaba dei ka tamasa kaba saw sngi kynthih jong ki Pnar ka la kut noh ha ka 3 tarik Naitung hapdeng ka jingshongkun bad ka jingiashim bynta jong ki hajar ngut ki khun ki hajar jong ka Sein Raij Jowai.

Haba pynpaw ia ka jingkmen ban ioh ia ka lad ban iadon bynta lang ha kane ka tamasa, u Myntri Rangbah ka Jylla u Conrad K Sangma u la ong, “Nga shim ia kane ka kabu ban ai khublei Behdeinkhlaim kaba kmen ia baroh ki nongshong shnong ka Jylla.Kane ka dei kawei na ki tamasa kaba kongsan ha ka Jylla. Kane ka dei ka sien kaba lai ka jong nga ba ngan wan iashim bynta bad ban iadon bynta ha kane ka tamasa kaba la nangphuh bad shongkun.”

U CM haba pynpaw halor ka jingdonkam ban kyntiew ia ka kolshor bad ka riti dustur tynrai jong ki trai shnong riewlum, u la ong ba na ka liang ka sorkar Jylla ka la pynlut T.6.5 klur na ka bynta ban shna ia ki jingtei bad jingpynitynnad ha madan Aitnar.

“Ngi sngewkmen shibun ba ngin lah ban bteng barabor ban aijingkyrshan ia kane ka tamasa katba lah.Kumba phi tip ba ia ki jingtei ha kane ka jaka ki dei kiba la pynshna da ka sorkar lyngba ka Tnat Tourism kaba kot haduh T.6.5 klur. Ngi don ruh ka jingngeit kaba skhem ba ka jingpynneh ia ka riti dustur tynrai ka jylla bad ki briew jong ngi ka long kaba kongsan,” u la ong.

Ha kane ka tamasa Behdeinkhlaim ba kongsan jong ki nong Jaintia la sakhi ia ka jingiashim bynta shithem jong ki paidbah ha ki jinglehniam tynrai ban beh ia ka khlam bad ki jingpang jingshitom bad ban bha ha ka rep ka riang.Ia kane ka tamasa la ju rakhe man la u snem ha u bnai Naitung hadien ba la pyndep lut ia ka thung ka tep.

Ka bynta kaba kongsan jong kane ka jingleh niam ka dei halor ka jingshna ia u “Dien Khlam ” bad “Khnong ”, ba la shna pynpyllun bha bad pynjlih bad pynbeit bha hadien ba la wan pynkhyllem na khlaw ha kaba la ju wanrah sha sor Jowai kaba dei ka district headquarter.

Kham hashwa jong kane ka sngi ia u ‘Symbud khnong’ uba dei u dieng pyllun uba jrong la wanlam ha kaba da ki hajar ngut ki briew ki wan ban ialum na ka bynta ban iohlad ban ktah ia u. La ngeit ba da kaba shu ktah ia une u Khnong un iada na baroh ki jait jingpang jingshitom bad ba kin bha ha ka liang ka kamai kajih bad ki jingtrei jingktah.

Katkum ka jingngeit ha ka Niamtre, ka Behdienkhlam kam dei tang ban beh noh ia ki jingpang jingshitom hynrei ruh ia ki kam sniew kam smeh kiba ktah mationg ia ka imlang ka sahlang.

Nalor kata ki khynnah samla na ki kyntoit bapher bapher ka sor Jowai ruh ki pyrshang ban pynpaw ia ki sap ha kaba shna pynwandur ia ki rot kiba don ia ka jingjrong kaba 10-40 phut ba la shna da ki siej bad pynwandur itynnad da ki kot bad kiwei pat kiba don ia ki rong ki rup kiba itynnad.

La shna ia kine ki rot da kaba pynshong nongrim ruh halor kiba bun ki mat kiba iadei bad ka imlang ka sahlang, ki kam sain pyrthei, ka jingiada ia ka mariang bad kiwei pat.Ia kine ki rot la pyni paidbah ha kane ka sngi ha Aitnar kaba dei ka jaka ba kyntang.