Kut noh ka lympung inter school athletic meet u DSO EKHD

Syllad | The Rising MeghalayaMay 20, 2022

Ka lympung ialehkai Inter School Athletic Meet, ba la pynlong ia ka da ka ophis jong u District Sports Officer, East Khasi Hills District ka la poi noh sha kaba kut hynne ka sngi, ha madan ialehkai jong ka SAI, STC kaba don ha kut jong skul bah pule ka North Eastern Hill University.

Ha kane ka kynti kaba mynta la don 23 tylli ki skul ba la poi ban iashim bynta sha kane ka lympung, kaba la lah ban pynlong biang ar snem hadien ka jingbym lah shuh ban pynlong ia ka na ka daw ka jingwan ban saphriang noh ka jingpang iabit Covid 19.

Ha kine ki lai sngi ka jingpynlong ia kane ka jingiakob la shem bad iohi ia ka jingtrei shitom jan baroh ki khynnah skul ba la wan ban iashim bynta, ban kynjoh ia ka thong ban ioh ban khur ia ka jingjop ne ia ki takma, na kiba un ki jingiakob ba kynthup ia ka track bad ka field event.

Ha kaba kut jong ka sngi ki skul ba la ioh ban rah ia la kin am lahduh na kilai tylli ki kyrdan ialehkai ka long ba ha ka U-14 na ka liang ki khynnah shynrang, ka nam lahduh la ioh rah ia ka da Seven Huts Higher Secondary School kaba la wan hadien ba ka la ioh ba kan khur 3 tylli ki takma ksiar bad kawei ka takma rnong, katba naka liang ki kynthei, ka nam lahduh ha kane ka kyrdan iakhun la rah i aka da ka St Mary’s Hr Secondary School hadien ba ka la ioh ban khur ar tylli ki takma ksiar.

Ha ka kyrdan iakhun ka U-16, na ka liang ki shynrang ka nam lahduh ka la rah ia ka da ka St. Anthony’s Higher Secondary School, hadien ba ka la ioh ba kan khur 4 tylli ki takma ksiar, 2 tylli ki takma rupa bad 3 tyli ki takma rnong, katba na ka liang ki kynthei ia ka nam lahduh la khur ia ka da ka Loreto Convent, Shillong hadien ba ka la ioh ba kan khur 3 tylli ki takma ksiar bad mar saw tylli ki takma rupa bad rnong.

Ha ka kyrdan iakhun jong ka U-18 pat ka nam lahduh na ka liang ki khynnah shynrang la rah ia ka da ki khynnah ka St. Anthony’s Higher Secondary School hadien ba ka la ioh ba kan khur mar 5 tylli ki takma ksiar bad rupa bad 4 tylli ki takma rnong bad na ka liang ki kynthei ka nam lahduh ka leit sha ka St Mary’s Hr. Secondary School hadien ba ka la ioh ba kan khur 6 tylli ki takma ksiar bad mar kawei ka takma rupa bad rnong.

Kongsan ba la wan ban iadon lang ha ka por ba pynkut ia kane ka lympung dei kong M. Lyngwa, District School Education Officer, ki nonghikai jong ki skul ba la wan iashim bynta bad kumjuh ki khynnah skul bad kumjuh u bah O. Mawthoh DSO, ki Coach, PTI jong ka ophis u DSO EKHD, Directorate of Sports & Youth Affairs, ki nongpyniaid athletic ka jylla bad kiwei kiwei.